Ҳожимат Эркинов: “Мураббийларимизнинг кўрсатмаларини тўғри бажарганимиз туфайли ғалаба қозондик”

Ҳамюртларимиз учун ғалаба билан тугаган учрашувдан сўнг “Қўқон 1912” клуби футболчиси Ҳожимат Эркинов фикрларини билдириб ўтди.

- Биринчи галда Ҳиндистонга қарши кечган ўйин ҳусусидаги илк фикрларингиз...
- Менимча яхши беллашув бўлди. Биринчи бўлимда озгина қийналдик. Рақибимиз мудофаада тартибли ҳаракатланди. Устига устак шамолга қарши тўп тепишга тўғри келди. Иккинчи таймни анча фаол бошладик ва ўз мақсадимизга эришдик.

- Ҳиндистонда футбол йилдан йилга ривожланмоқда. Улар Тошкентда бўлиб ўтган U-16 осиё чемпионати саралашида биринчи ўринни эгаллаб кейинги босқичга чиқишди. Мазкур ёш тоифасидаги терма жамоадан ҳам жиддий қаршилик кутганмидингиз?
- Ҳа. Албатта. Барча мамлакатлар қатори у ерда ҳам футболга катта эътибор қаратилаётганини билардик. Бизга муносиб қаршилик туғдиришди.

- Жамоадаги айрим футболчиларда халқаро тажриба йўқ эди. Ўртоқлик ўйинлари ўз йўлига. Шу сабабдан илк дақиқаларда ҳаяжон бўлгани табиий...
- Босим ва ҳаяжон ҳар бир футболчида бўлади. Чунки, биз ватанимиз ва оиламиз шаънини ҳимоя қилиш учун тўп тепяпмиз. Фикримча, мураббийлар штабининг кўрсатмаларини тўғри бажарганимиз туфайли уч очкони қўлга киритдик.

- Кейинги турда жамоа янада эркин ва ҳотиржам тўп тепиши мумкинми?
- Иккинчи турда бунданда оғир бўлишини тахмин қиляпмиз. Боиси, рақибларимиз бизнинг ўйинларимизни бошидан оҳиригача ўрганишганлиги аниқ. Футболчилар ва мураббийлар билан биргаликда рақибларимизни таҳлил қиламиз ва шунга яраша ҳозирлик кўрамиз.

Абдулазиз Искандаров суҳбатлашди