Гвардиола Холанд ҳақида: "4 ёки 5 та гол урмагани учун афсусдаман"

"Манчестер Сити" клуби бош мураббийи Пеп Гвардиола бугун "Эвертон"га қарши ўйинда дубль қайд этиб, учрашув тақдирини ҳал қилган Эрлинг Холанд ҳақида гапирди.

"Терма жамоалар ўйинларидан кейинги танаффусдан сўнг одатдаги биринчи тайм бўлди. Биз тўп эгалигини назорат қила олмадик, бу осон кечмади. "Эвертон" ва Дэвид Мойес ажойиб иш олиб бормоқда. Сифат юқори даражада, узун паслар ва тажрибали ҳимоячилар мавжуд. Уларга қарши ўйин услубини топганимиздан сўнг, яхшироқ ўйнай бошладик.

Холанд тўрт ёки беш гол урмагани учун афсусдаман. Жиддий айтадиган бўлсам, мен ҳақиқатан ҳам мамнунман, бироқ биз фақат унга таяниб қололмаймиз, бизга бошқа ўйинчилар ҳам керак. Қанотдаги ўйинчилар, ҳужумкор ярим ҳимоячилар ҳам олдинга интилишлари ва гол уришни бошлашлари лозим. Ўйинни шундай ташкил қиламизки, Эрлингни паслар ва сифатли қўллаб-қувватлаш билан таъминлаймиз, аммо бошқалар ҳам фаол бўлишлари зарур.

Бизда аниқ гол уриш имкониятлари бўлди ва улардан фойдаланишимиз керак эди. Бу даражада ўйинчилар ўзларидан кўпроқ талаб қилишлари лозим. Савино, Жереми [Доку], Тижани [Рейндерс] - улар гол уришлари керак, акс ҳолда биз ўзимиз хоҳлаган натижага эриша олмаймиз.

Тўпни олдинга яхшироқ етказа бошладик ва ҳозирда Эрлинг бизнинг асосий футболчимизга айланди," деди "Манчестер Сити" бош мураббийи.