Футзал. Рустам Толибжонов: "Чемпионат иштирокчилари 18 миллион сўм бадал тўлашади"

- Янги мавсум учун регламент тасдиқландими?
- Ҳа, янги регламент тасдиқланди, бу ўтган йилгидан катта фарқ қилмайди. XIX миллий чемпионатимизнинг аввалгисидан фарқи, жамоаларнинг номида. "Турон-С" ҳамда "Строитель Зарафшон" бу йил чемпионатимизни тарк этишган бўлса, уларнинг ўрнида янги тузилган иккита жамоа - Олмалиқнинг "Олмалиқ" ва Қаршининг "Насаф" клублари чемпионатда иштирок этишади. Жами бўлиб XIX миллий чемпионатда 10та жамоа ғолиблик учун кураш олиб боради. Ҳозирга келиб иштирокчиларнинг барчаси заявкаларни топшириб бўлган, 30 кишини заявка қилиш мумкин, шундан ўйин қайдномасига 14 киши киритилади.

Бу йилги мавсумдан бошлаб 1995 йилда туғилган ва ундан кичик ўйинчилар ёш футзалчилар деб ҳисобланади, агар клуб берган заявкада ёш ўйинчилар бўлса, ўйин қайдномасида камида иккита ёш ўйинчи бўлиши шарт.

- Клублар бадал пулларини тўлашдими ва бадал пули қанчани ташкил этади?
- XIX миллий чемпионатимизда қатнашувчи 10 жамоанинг барчаси бадал пулларини тўлаб бўлди. Бадалнинг миқдорига келадиган бўлсак, чемпионатда иштирок учун 18 миллион сўм, Ўзбекистон кубогида қатнашиш учун 2 миллион сўм тўлашади.

- Терма жамоа учун кейинги режалар тузиб олинганми?
- Тошкентда бўлиб ўтадиган биринчи тур беллашувларини ўтказиб олганимиздан сўнг, режага кўра терма жамоа 3 ноябрдан Тошкентда йиғин бошлайди. Ҳозирга келиб терма жамоага 20 нафар футзалчи чақирилган, шулардан 15 нафари БАА терма жамоаси билан бўлиб ўтадиган ўртоқлик ўйинларига олиб кетилади (БАА билан 13-14 ноябрда иккита ўртоқлик учрашуви ўтказилади).

- Мураббийлар штабида ўзгаришлар бўлмадими?
- Ҳозирча йўқ. Баҳодир Аҳмедов бош мураббий бўлса, Николай Одушев ёрдамчи мураббий.

- Декабрга мўлжалланаётган турнир ҳақида нима дея оласиз?
- Декабрь ойида Тошкентда халқаро турнир ўтказамиз. Унда тўртта терма жамоа қатнашади. Ҳозирча Ўзбекистондан ташқари, Қозоғистон ҳамда Озарбайжон терма жамоаларининг турнирда иштирок этиши маълум бўлиб улгурди. Тўртинчи иштирокчининг номи эса яқин кунларда маълум бўлади. Агар таклифимизга ижобий жавоб олсак, бу Беларусь терма жамоаси бўлиши мумкин.
Турнир 1-3 декабрь кунлари бўлиб ўтади. Иштирокчилар бир кун олдин келиб машғулот ўтказишади.

- Турнирда қатнашадиган терма жамоаларнинг харажатларини ким кўтаради?
- Тошкентга етиб келиш учун авиачипталар ўз ҳисобларидан, қолган барча харажатлар бизнинг, яъни Ўзбекистон футбол федерацияси ва Ўзбекистон футзал ассоциацияси ҳисобидан. Буни ичига меҳмонларни кутиб олиш, уларни транспорт билан таъминлаш, меҳмонхона ва машғулот ўтказиш учун спорт зал билан таъминлаш кабилар киради.


Толибжон Қосимов суҳбатлашди