Фотомақола. Инчеондан ёзамиз. 3-кун кундалиги, футболни ҳам бошладик
16 сен 2014 20:19
Янгиликлар

Фотомақола. Инчеондан ёзамиз. 3-кун кундалиги, футболни ҳам бошладик

Кечадан эътиборан медиа марказда иш бошладим. Энди барча эшиклар мен учун очиқ эди.

Аввал спортчилар шаҳарчасига бордим. У ерда МОҚ матбуот котиби Шавакат ака Жалилов билан медиа марказга боришга қарор қилдик. Ундан аввал медиа шаҳарачани айланиб чиқдик. Спортчиларга яратилган шароитлар аввалги Осиё ўйинларидан яхши эмас дейишяпти. Мен эса ҳар қандай мусобақани Қатардаги Осиё Кубоги билан солиштиришга ўрганиб қолганман. "Кичкина табиб" фильмида "яшаса бўлади", дейдику, ҳудди шундай, яшаб ишласа бўлади.

Спорт шаҳарчасига келиб кетишим 8 км атрофида йўл, ҳар куни бизнинг пулга, таксига 30 000 сўм тўлаб, кунда бир музлаб оляпман. Тошкентдаги салқин ҳаво мени такси орқали тақиб қилаётгандек. Албатта бу ҳазил учун ёзилди. Ватан учун ишламасак, ким учун ишлаймиз?

Мусобақа ҳомийси "KIA" спортчи ва ОАВни автобус билан таъминлаяпти.

Ҳар бир қаватда иккита квартира бўлиб, 3 хонали уйда 7 кишига мўлжалланган ётоқ бор. Спортчилар зерикиб қолмасликлари учун турли кўнгил очар нарсаларни кўришингиз мумкин. Теннис, бильярд, массажли креслолар. Ресторанда барча миллатга мос таомлар. Маҳсус ҳужжати бор мухбирлар кўрсатув тайёрлаб чарчамаяптилар. Шаҳарча билан танишганимдан кейин медиа марказга йўл олдик. Маҳсус автобус бизни манзилимизга етказиб қўйди. У ерда иш аллақачон қайнаб бўлган. Иккита катта медиа марказ, бирида ТВ ходимлари, иккинчида босма ва интернет нашрлари учун ишлаётган журналистларни кўришингиз мумкин. Шавкат ака ўзлари учун керакли ахборотларни олганларидан кейин ортга қайтдилар. Мен эса бироз ишлашим керак эди. Ўзимга керакли барча маълумотларни олиб бўлгач тамадихонага кирдим. Сал "муздек" экан.

Бильярдхонада футболчилар ҳордиқ чиқаришяпти

Афғонистон - Бангладеш ўйини мен учун қизиқ эди. "Мунхак" стдионида мен каби бир ўзи ишлаётган кишига бироз қийинчилик туғдирар экан. Илк маротаба катта мусобақага ўзим чиқишим. Шу кунгача бир неча ЖЧ ва ОЧларда қатнашган бўлсам, уларнинг барида ҳамрохларим Беҳзод Назаров, баъзида Камолиддин Алимов бўлар эди. БААда бўлиб ўтган ЖЧда эса Хайрулла Холиқов иккимиз хизмат қилган эдик. Бундай пайтлар ишни тенг бўлиб олиш имкониятига эга бўлардик. Мен фақат расм оламан ва микст зонага тушиб футболчиларнинг фикрлари билан қизиқаман. Шерикларимдан бири ўйин шарҳини ёзиб туриб, кейин матбуот анжуманида иштирок этади. Бу ерда эса барчасини ўзим қилишим керак. Бунинг учун жисмоний катта кучингиз бўлиши керак. Ундан ташқари тезкор бўлмасангиз биридан қолиб кетишингиз аниқ. Шунинг учун бу стадион менга мақул келмади. Фотомухбир кирадиган дарвозага анча юриб боришингиз керак. Бир ўйин давомида икки маротаба келиб кетасиз. Ҳуллас ишни амалладим.

Автобус кутиш пайтида Шавкат ака билан

Менга алам қилгани Афғонистон - Бангладеш ўйинидан кейин ўтказилган матбуот анжуманида 4 нафар бангладешлик журналист бор эди. Кимдир ёзса, яна кимдир ТВ учун съёмка қилар. Фотомухбирлари йўқ экан, бангладешлик ҳамкасбим мендан сурат сўради. Меҳнатини қадирлаган ҳолда ўтказиб бердим.

Ҳудди шундай ҳолатда ўзимизнинг ўйинда ҳам ижод қилгач, матбуот анжуманига кирдим. Гонконгдан журналистлар келганлиги учун биринчи қисм узоқ давом этди. 10га яқин савол берилди. Қосимов киргач ОАВдан мен ва Шавкат ака қолдик. Иккита савол бериб қўйдим, сайтга нимадир чиқсин дедимда. Одатда ўйин олди ва ўйиндан кейин матбуот анжуманларида фаол бўлмайман. Ўйин олдидан ўтказилинадиган матбуот анжуманларида фақат расм олиш учунгина иштирок этаман. Чунки ўйинга қадар ўтказилинадиган беш кунлик машғулот жараёнида "ким, нима, қаерда?", каби саволларга жавоб олиб бўламан. Шунинг учун баъзан, "эртага ким тушади, кимда жароҳат бор", - каби саволларни эшитсам энсаларим "қотади". Эй одамзод, ҳеч бўлмаса 1 кун аввалги машғулотга келиб бил, шунда саволинг бошқача чиқади, "Мана Эшмат тушмайди, ўрнига ким тушади?". Мураббий ўйланиб жавоб берсин. Ёки "бурчак тўпларини тепишни ўргатяпсизми?", бу савол эмас-де энди. Келсангиз кўрасизда. Ўйиндан кейинги матбуот анжуманида тактикага доир савол бера олмайман. Бунинг сабаби, гоҳ расм оламан, гоҳ ишлайман, яна нимадирлар қилиб, ҳақиқий таҳлил боп ўйинни кўра олмайман. Шунинг учун ўйинга оид шарҳларим бироз кеч чиқади, токи ўйинни қайта кўриб аниқ бир фикрга келмагунимга қадар.

Мана ўша тўрт нафар журналист

Кеча ўйиндан кейинги матбуот анжуманига бир юзеримиз, "сиз ҳам савол беришни билмас экансиз", деб фикр қолдирипти. Кетидан иккинчиси, "билса берадида", деб жавоб қайтарди. Мен ҳам "делет" билан жавоб бердим.

Мен баъзан футболчилар ютқазиб қўйса ҳам танқид қилмайман. Бу улардан қўрқиш ёки юз хотир учун эмас. Уларни меҳнатини кўра туриб танқид қилиш бўлмапти. Ҳудди шундай, бизнинг ҳам меҳнатимизни кўриб билмай туриб, "клавятура"ни шақиллатиш бўлмапти!

Нодирхўжа Юлдашев

Ҳавола :

Манба : championat.asia

Янгиликларни Телеграмда ўқинг!

Рейтинг: