Фарҳод Бекмуротов: “Нефтчи” устидан қозонилган ғалабани Валижоновга бағишлаймиз”

Табиийки ғалабадан сўнг Фарҳоднинг кайфияти аъло даражада эди.

- Чемпионатдаги биринчи ғалабани қўлга киритдик. Албатта дербида муваффақият қозонганимиздан мамнунман. Мазкур учрашувга пухта ҳозирлик кўргандик. Мухлисларимиз ғалабани соғиниб қолишганди. Шу боис бугун ютмасак бўлмасди.   

- Ўйин кутилганидан ҳам қийин бўлди. Иродали ғалабага эришдик. Биринчи голдан сўнг қисқа вақт ичида жавоб тўпини киритиб олдик. Шу боис айтарли руҳий тушкунлик бўлмади. Аҳиллик эвазига ва мураббийларнинг тўғри кўрсатмалари туфайли бугунги учрашувда ғалаба қозондик деган бўлардим.  

- “Нефтчи” ҳам кучли жамоа. Таркибда 2-3 йилдан буён бига ўйнаб келаётган футболчилар кўп. Асосий таркиб ўзаги уларда сақланиб қолган. Бу эса жамоавий ўйинни яхши йўлга қўйилишида муҳим ўрин тутади. Бундай жамоа устидан ғалаба қозонганимиздан хурсандман.

- Кеча жамоамизнинг етакчи футболчиларидан бири бўлмиш Отабек Валижоновнинг туғилган куни эди. Бугунги ғалаба унга муносиб совға бўлди дея оламан. Дербидаги ғалабани айнан унга бағишлаймиз.

- Ўзимга келадиган бўлсак, тўғриси кўрсатган ўйиним борасида мухлислар ва мутахассислар баҳо берсин.

- Сўзим якунида шуни айтиб ўтмоқчиманки, бугунги учрашувда бизни ажойиб тарзда қўллаб-қувватлаб турган содиқ ишқибозларимизга миннатдорчилик билдираман. Умид қиламанки, келгуси ўйинларда ҳам мухлисларимизни хурсанд қиламиз, - дейди Бекмуротов.

"Андижон" матбуот хизмати