Эронлик футболчилар клубларида қандай ўйнаяпти?

Жамоаларнинг ўйинга тайёргарлиги ва турли маълумотларни ўқувчиларимиз эътиборига тақдим этиб боряпмиз. Учрашув арафасида эса Эрон терма жамоасига жалб этилган футболчиларнинг жорий мавсумдаги кўрсаткичлари ва ўйинчиларнинг алоҳида хусусиятлари ҳақида сўз юритамиз.

Карлос Кейруш таркиб борасида кичик муаммога дуч келди. Ўзбекистонга қарши учрашувда асосий ҳимоячилардан бири саналган Пежман Монтазори чақирилмади. У Хитой билан беллашувда елкасидан жароҳат олганди. Шу тариқа Қатарда фаолият олиб бораётган ҳимоячи бугунги баҳсда жамоасига ёрдам бера олмайди.
Шунингдек, Голландиянинг “АЗ Алкмаар” клубида ўйнаётган қанот ярим ҳимоячиси Алиризо Жаҳонбахш сентябрь ўрталаридан бери майдонга туширилмади. Бунга унинг оёғининг юқори қисмидан олган жароҳати сабаб қилиб кўрсатилган. Лекин Кейруш уни терма жамоа йиғинига жалб этган. Қатарнинг “Ал Араби”сида тўп тепадиган Ашкан Дежага ҳам жароҳат туфайли ўйин амалиётига эга бўлгани йўқ. У тикланиш жараёнидан сўнг машғулотларга қўшилган, бироқ унинг ҳолати асосий таркибда тушишга имкон берадими-йўқми, буни билмаймиз.

Дарвозабонлар хусусида тўхталсак, Португалиянинг “Маритиму” клуби посбони ва асосий дарвозабон ҳисобланган Алиризо Ҳақиқи клубида бирор учрашувда майдонда ҳаракат қилмади. Шунга қарамай, португалиялик мутахассис айнан Ҳақиқига ишонч билдирмоқда. Эрон чемпионатида ўйнайдиган Бейранванд ва Ахбори эса “Персеполис” ҳамда “Тракторсози” сафида барча беллашувларда тўлиқ ўйнашган.

Ҳимоячилар орасида “Персеполис” вакили Рамин Ризоиян бирор беллашувда ўйнамаган. У ҳам ҳозирча Кейрушнинг ишончини қозониб келмоқда. Ризоияннинг клубдошлари Жалол Ҳуссайн ва Муҳаммад Ансари жамоанинг етакчи ҳимоячилари саналишади. Улар деярли мунтазам равишда асосий таркибда майдонга тушишади. Теҳроннинг “Истиқлол” клубидан Вурия Ғофури, Хузистоннинг “Истиқлол” жамоасидан Иззатилло Пурғаз ҳам терма жамоага чақирилган. Улар барча беллашувларда иштирок этишган. Саид Оғаий эса ҳимояси ишончли кўринаётган “Тракторсози”да асосий роллардан бирини бажариб келмоқда. Икки ҳимоячи хориж клубларида фаолият олиб боришади. Муртазо Пуралиганжи Қатарнинг “Ал Садд” клубида икки ўйинда майдонга тушиб улгурди. Милад Муҳаммади эса Россиянинг “Терек” клубида 6 беллашувда ҳаракат қилди. У жорий мавсумни анча яхши ўтказмоқда. “Сепахан”га Германия биринчи лигасидан қайтган Эҳсон Ҳожсафи анча ёрқин таассурот қолдирмоқда. У ҳужумга тез-тез қўшилишни хуш кўриши билан танилган.

Ярим ҳимоя Эроннинг энг кучли нуқталаридан бири ҳисобланади. Сардор Андраник Теймуриян мавсумни яхши ўтказмаётган “Машинасози” сафида 7 ўйиннинг 6тасида майдонга тушди. “Истиқлол”да Умид Иброҳими, “Тракторсози”да Суруш Рафеи 7тадан беллашувда ҳаракат қилишди. “Персеполис” аъзоси Воҳид Амири ва “Сайпа” футболчиси Меҳди Туроби эса рақиб дарвозасини ишғол этишга уста. Амири 2, Туроби 4 бор Эрон чемпионатида гол уришга муваффақ бўлишган. Легионерлардан Саид Иззатуллоҳи “Ростов” таркибида мавсум бошида кўпроқ ўйин амалиётига эга чиққанди. Охирги пайтларда унга фақат баҳс охирларида имкон беришмоқда. Жаҳонбахш ва Дежага тўғрисида мақола бошида маълумот бердик. Грециянинг “Панионис” клуби аъзоси Масъуд Шожаи эса 4 учрашувда 2 гол муаллифига айланди.

Ҳужумчилар танлови борасида Эронда муаммолар йўқ. Меҳди Тареми “Персеполис” сафида 3 тўп киритишга эришди. Карим Ансарифард Греция юқори лигасида 4 ўйинда 2 гол муаллифига айланди. Ризо Ғучаннажод Голландия олий дивизионида 8 беллашувда 3 тўп киритди. “Ростов”да ўйнаётган Сардор Азмун эса ҳозирча ўзи майдонга туширилган 7 баҳсда гол урмади, аммо жамоавий ўйин ва шерикларига яхши вазиятларни яратиб беришда у катта ҳажмдаги ишни амалга ошириб келяпти.
Эрон терма жамоаси Кейруш қўл остида асосан ҳимояда тартибли ўйнаб, қанотлар ва стандартлардан тўпни жарима майдонига ошириш, узоқдан зарба йўллаш орқали натижаларга эришишга интилмоқда. Эрон ОАВ бунинг учун охирги пайтларда Кейрушни танқид остига олиб келяпти. Бошқа томондан эса форслар Бразилиядаги жаҳон чемпионати йўлланмасига эга чиқишди.

Беҳзод Назаров тайёрлади