“Эл Класико” олдидан “Реал”нинг икки футболчиси жароҳат олди

Учрашувда дублга эришган Карим Бензема иккинчи голни ураётга вақтидан чап оёқ мушакларини лат еганлиги айтилмоқда. У ўйнашга ҳаракат қилди, аммо 85-дақиқада майдонга ўтириб, баҳсни давом эттиролмаслиги маълум бўлди.

Карло Анчелотти захира имкониятларидан тўлиқ фойдаланиб бўлгани туфайли мадридликлар ўйинни 10 киши бўлиб якунлашларига тўғри келди.

Шунингдек, вингер Родриго Гоэс ҳам жароҳат олди ва майдонни шифокорлар ёрдамида тарк этди.

Эслатиб ўтамиз, “Реал”ни 20 март куни “Барселона”га қарши классик тўқнашув кутмоқда.