Coca Cola Суперлигаси. Энг кам гол ўтказганлар тўқнашуви, "Бунёдкор"ни сафарда юта олмаган "Навбаҳор" ёхуд 8-тур превьюси

Coca Cola Суперлига. 8-тур

6 июль, душанба
19:00 - ЛОКОМОТИВ – СУРХОН (Маҳалла ТВ LIVE)
Ҳакамлар: Ильгиз Танташев, Артём Калинин, Султонмурод Улфатов, Наим Қосимов
Назоратчи: Олег Дачев
Комиссар: Эркин Бахтиёров

Ўтган турда кетма-кет учта мағлубиятли сериясига барҳам берган "Локомотив" бешта турдан буён ғалаба нималигини билмаётган "Сурхон"ни қабул қилади. Термизликлар кетма-кет тўртинчи ўйинни сафарда ўтказишади.

Бу икки клуб шу кунга қадар Ўзбекистон чемпионатида 4 бор тўқнаш келишган. "Локомотив" битта баҳсда ғалаба қозонган, қолган учта ўйинда дуранг қайд этилган. Яъни "Сурхон" ҳозирга қадар "Локомотив"ни умуман мағлуб эта олмаган.

Мазкур баҳс Равшан Ҳайдаров учун "Сурхон" бош мураббийи сифатидаги дастлабки ўйини бўлади.

20:00 - ҚИЗИЛҚУМ – АНДИЖОН (Оилавий ТВ LIVE)
Ҳакамлар: Акобирхўжа Шукуруллаев, Жалғасбай Сарсенов, Дамир Искандеров, Санжар Назаров
Назоратчи: Андрей Тамбовцев
Комиссар: Рамиль Ильясов

2020 йилги Ўзбекистон чемпионатида ғалаба эриша олмаган иккита клуб ўртасидаги баҳс. "Қизилқум" бу мавсум сўнгги 4та ўйинда рақиблари дарвозасига гол ура олмади ва 4 марта мағлуб бўлди. "Андижон" эса охирги иккита турда икки бор дуранг ўйнади. Тачмурод Агамуродов бошчилигидаги жамоа бу мавсум ўз майдонида ўтказилган 4та ўйиннинг барчасида имкониятни бой берди.

Бу жамоалар ҳозирга қадар чемпионат доирасида 32 марта ўзаро ўйин ўтказишган. Тўқнашувларнинг тенг ярмида навоийликлар ғолиб бўлишган, 13та учрашувда "Бургутлар"нинг қўли баланд келган, яна 3та ўйинда дуранг кузатилган.

"Андижон" "Қизилқум" майдонида фақат бир бор ғалабага эришган (2012 йил) ва сафарда кетма-кет 4та ўйиндан буён бу жамоани мағлуб эта олмаяпти.

20:00 - НАСАФ – МЕТАЛЛУРГ (СПОРТ ТВ LIVE)
Ҳакамлар: Азиз Асимов, Шоҳруҳ Аъзамов, Сардор Нишонбоев, Шуҳрат Ражабов
Назоратчи: Ноил Лутфуллин
Комиссар: Жаҳонгир Раҳматуллаев

"Насаф" бу мавсум ўз майдонида умуман ютқазгани йўқ. "Металлург" эса сафарда ўтказган охирги 3та ўйиннинг барчасида ғалабага эришди. "Металлург" вакили Станислав Андреев кетма-кет 3та турда жами 4та гол урди.

Бу жамоалар ҳозирга қадар ўзаро 44та ўйин ўтказишган. 27 бор "Аждарлар" ғолиб бўлишган. 11та учрашувда бекободликлар 3 очкога эга чиқишган. Қолган 6та ўйинда томонлар муросага келишган. "Металлург" Қаршида ўтган 22та ўйиннинг 2тасида ғолиб бўлган (2019 ва 2015 йилларда). Қизиғи ўтган мавсум "Насаф" Бекободда, "Металлург" эса Қаршида ғалаба қозонган.

7 июль, сешанба
19:00 - ПАХТАКОР – МАШЪАЛ (Маҳалла ТВ LIVE)
Ҳакамлар: Зокир Қодиров, Руслан Самандаров, Бахтиёрхўжа Шавкатов, Фарруҳ Янсупов
Назоратчи: Рашид Айтеков
Комиссар: Шерзод Ражабов

"Пахтакор" ўз майдонида ўтган 5та ўйиннинг барчасида ғолиб бўлди. "Машъал" эса сафарда 3та ўйин ўтказиб умуман ғалаба қозона олмади. Муборак клуби охирги 3та турда рақиблари дарвозасига йўл топа олмаган бўлса, "Шерлар" сўнгги 3та турда 10та гол уришди.

"Пахтакор" ва "Машъал" бугунга қадар 34 бор ўзаро тўқнаш келишган. 23 марта "Пахтакор" ғолиб бўлган, 5 бор "Машъал" зафар қучган. Қолган 6та баҳсда дуранг кузатилган.

"Машъал" Тошкентда бу жамоани фақат бир бор (2005 йил) мағлуб этган ва бир бор дуранг ўйнаган (2007 йил) қолган 15та ўйиннинг барчасида "Пахтакор" ўз уйида ғолиб бўлган. "Машъал" сафарда 11та ўйиндан буён "Шерлар"ни мағлуб эта олмай келмоқда.

20:00 - АГМК – ҚЎҚОН-1912 (Дунё Бўйлаб ТВ LIVE)
Ҳакамлар: Темур Тўхтасинов, Анвар Маражабов, Зиёдулла Абдураҳмонов, Ғайрат Жўраев
Назоратчи: Дмитрий Роман
Комиссар: Ахмед Тиллаев

Бу мавсум ҳозиргача энг кам гол ўтказган икки клуб ўртасидаги баҳс. АГМК ҳам, "Қўқон-1912" ҳам 7та ўйинда атиги 3тадан гол ўтказиб юборишди. АГМК дастлабки 7та турда умуман мағлуб бўлмаган ягона жамоа бўлиб турибди. Миржалол Қосимов бошчилигидаги олмалиқликлар охирги бешта ўйиннинг барчасида ғалабага эришишди. Бахтиёр Ашурматов шогирдлари сўнгги 3та турда 3та ғалабага эришишди ва умуман гол ўтказишмади. Қўқонликлар ўз майдонида ажойиб ўйнашмоқда, лекин сафарда бунинг мутлақо акси: 2та ўйин, 2та мағлубият, тўплар нисбати: 0:2.

Ҳозирга қадар бу жамоалар 12 бор ўзаро ўйин ўтказишган. 7 марта олмалиқликлар зафар қучишган, 3та учрашувда қўқонликлар ғолиб бўлишган. Яна иккита ўйинда дуранг қайд этилган.

Олмалиқда ўтган 6та учрашувнинг фақат биттасида "Қўқон-1912" муваффақият қозонган (2018 йил). Ўтган мавсум Олмалиқда кечган баҳсда мезбонлар 7:1 ҳисобида ғалаба қозонишган. Бу АГМК тарихидаги энг йирик ғалаба сифатида қайд этилган бўлса, "Қўқон-1912" учун энг йирик мағлубияти сифатида тарихга ёзилди.

20:00 - СЎҒДИЁНА – БУХОРО (Оилавий ТВ LIVE)
Ҳакамлар: Фирдавс Норсафаров, Тимур Галеев, Дониёр Сайлавов, Комил Расулов
Назоратчи: Сайфиддин Эрматов
Комиссар: Зоҳиржон Акрамхонов

Ўз майдонида умуман ютқазмаган "Сўғдиёна" бу турда сафарда умуман ғалаба қозона олмаган ҳамда гол ура олмаган "Бухоро"ни қабул қилади. Умуман олганда Муҳсин Муҳаммадиев бошчилигидаги бухороликлар 2020 йилги Ўзбекистон чемпионатида ғалаба қозона олмаган учта клубдан бири бўлиб турибди.

Бу икки клуб Ўзбекистон чемпионатида 48 марта ўзаро ўйин ўтказишган. 23та учрашувда бухороликлар, 18та ўйинда жиззахликлар ғалаба қозонишган. 7 марта дуранг қайд этилган. "Сўғдиёна" ўз уйидаги охирги икки учрашувда "Бухоро"ни икки бор мағлуб этган ва умуман гол ўтказмаган.

20:00 - БУНЁДКОР – НАВБАҲОР (СПОРТ ТВ LIVE)
Ҳакамлар: Аскер Нажафалиев, Андрей Цапенко, Тимур Гайнуллин, Алишер Тўхтасинов
Назоратчи: Бобур Ҳайдаров
Комиссар: Лазиз Қўчқоров

Ўз майдонидаги барча учта ўйинда ҳам ғалабага эришган ва гол ўтказмаган "Бунёдкор" охирги учта турда учта ғалабага эришган "Навбаҳор"ни қабул қилади.

Ҳозирга қадар бу жамоалар Ўзбекистон чемпионатида 28 бор тўқнаш келишган. 19 марта тошкентликлар, 4 бор наманганликлар ғолиб бўлишган.

Тошкентда ўтган 14та ўйиннинг 12тасида "Бунёдкор" ғалабага эришган, иккита баҳсда дуранг қайд этилган. Яъни "Навбаҳор" сафарда "Қалдирғочлар"ни умуман мағлуб эта олмаган.