Бугун футбол. "Сўғдиёна" - "Пахтакор"

Жиззахнинг "Сўғдиёна" клуби ўз майдонида амалдаги чемпион "Пахтакор"ни қабул қилади. Дастлабки учта турдан сўнг 9 очко тўплаган "Пахтакор" турнир жадвалида биринчи ўринда боряпти. "Сўғдиёна" эса атиги 1 очко жамғарган ҳолда 12-поғонани эгаллаб турибди.

Жорий мавсумни сафарда "Машъал"га қарши баҳс билан бошлаган жиззахликлар кутилмаганда 0:3 ҳисобида мағлуб бўлишди. Кутилмаганда дейишимиз боиси "Сўғдиёна" ўтган йил 4-ўринни қўлга киритганди, "Машъал" эса бу йил Суперлигага қайтди. Улуғбек Бақоев шогирдлари шундан сўнг уйда АГМКни қабул қилиб 1:1 ўйнашди. Бу баҳсда майдон эгалари бир киши кам қолган рақибни мағлуб эта олишмади.

"Сўғдиёна" 3-турни яна сафарда ўтказди ва "Қўқон-1912" майдонида 1:2 ҳисобида мағлуб бўлди. Шундай қилиб дастлабки 3 турда Бақоев шогирдлари ҳали ғалаба қозонгани йўқ. 

"Пахтакор" учун бу биринчи сафар ўйини бўлади. Чунки жамоа бунгача кетма-кет учта турни ўз майдонида ўтказиб учаласини ҳам ғалаба билан тамомлаган. "Шерлар" илк турда "Навбаҳор"ни 2:1, ундан кейин "Бухоро"ни 3:0 ва охирги турда "Металлург"ни 4:1 ҳисобида мағлуб этишди.

Бугунги учрашув олдидан "Пахтакор"нинг имкониятлари юқори баҳоланмоқда. Лекин ҳар икки жамоа икки ярим ойлик карантиндан яқинда чиққанини ва деярли бир хил ҳолатда эканлигини унутмайлик. 

Бугун "Сўғдиёна" мавсумдаги илк ғалабасини қўлга киритишга уриниб кўради. "Пахтакор" эса ғолибона юришини давом эттиришга ҳаракат қилади. 

P/S. Соат 18:00да бошланадиган ўйинни "Спорт" телеканали орқали тўғридан тўғри кузатиб боринг.