Бугун футбол. "Шўртан" - "Бунёдкор"

«Шўртан» (Ғузор) – «Бунёдкор» (Тошкент)
Ҳакамлар: А. Асимов (Тошкент), Р. Серазетдинов (Тошкент), Б. Қодиров (Бухоро), Э. Турсунов (Бухоро).
Назоратчи: Б. Тоғаев (Тошкент).
ЎзПФЛ вакили: Н. Лутфулин.

Ўйиндан нима кутяпмиз? Бугун Ғузорда охирги уч турдан бери иши юришмаётган жамоалар ўзаро баҳс олиб боришади. Бундай дейишимизнинг боиси, "Шўртан" ўз майдонида "Локомотив" ва "Пахтакор"ни ютганидан бери кейинги учта ўйинда фақат мағлубиятга учради. "Бунёдкор" эса охирги учта баҳснинг биттасида енгилиб, икки бор дуранг ўйнади. Бугунги учрашувда жамоаларнинг имконияти тенг дея оламиз.

Факт: "Шўртан" шу пайтгача ўз майдонида бўлиб ўтган бешта ўйиндан учтасини ғалаба билан якунлаган. Ғузорликлар "Нефтчи", "Локомотив", "Пахтакор" сингари клубларни мағлуб этди-ю, лекин "Машъал" билан "Қўқон-1912"га ютқазиб қўйди. Бундан ташқари, "Шўртан" барча уч ғалабасини уйдаги ўйинларда қўлга киритган.

Факт: "Бунёдкор" "Шўртан"дан атиги бир очко кўп тўплаган ҳолда турнир жадвалида 11-ўринда бормоқда. Мабода бугун ғузорликлар зафар қучишса, у ҳолда "Бунёдкор"дан ўзиб кетишади.

Факт: "Бунёдкор" ҳозирча сафарда тўртта ўйинда майдонга тушиб, шундан биттасида ғалаба қозознган. Жамоа "Нефтчи"ни 2:1 ҳисобида мағлуб этиб қайтган. Қизиғи шундаки, "Бунёдкор"нинг уй-сафар беллашувларида урган ва ўтказган голлар нисбати бир хил кўрсаткичга эга: 3-3.

Биласизми? Миржалол Қосимов бугун уч йиллик танаффусдан яна "Бунёдкор" бош мураббийи сифатида футболчиларга кўрсатма беради. Агар бугун "Бунёдкор" ғалаба қозонса, бу Қосимовнинг олий лигада 80-ғалабаси бўлади.