6 октябрь куни Ёнгиндаги "Миреу" стадионида Ўзбекистонга қарши ўртоқлик учрашуви якунлангач, Ким Мин Жэ, Хван Ин Бом ва Хван Хи Чан майдонга чиқиб, қучоқлашган ҳолда суратга тушишди. У ердаги муҳит одатдагидан фарқ қилар эди.
Корея футболидаги бир қатор манбаларнинг таъкидлашича, уч футболчи кийиниш хонасида айрим шерикларига "ҳеч нарса ўзгармаётгани" сабабли терма жамоадан кетиш қарорига келишганини айтган. Айнан қандай ўзгаришлар назарда тутилгани номаълум бўлса-да, баъзи футболчилар бу баёнотдан ҳали бехабар экани айтилмоқда.
Шу билан бирга, бошқа манбалар футболчилар терма жамоа билан хайрлашишга ҳали якуний нуқта қўймаганини таъкидламоқда. Хван Хи Чан ва Хван Ин Бом журналистларнинг "терма жамоадаги фаолиятингизни якунлаяпсизми?" деган саволини жавобсиз қолдирган. Айни пайтда бу уч ўйинчи Корея футбол ассоциацияси юқори мартабали раҳбарлари билан мазкур масалани реал вақт режимида муҳокама қилмоқда ва уларнинг фикри ўзгарган ёки йўқлиги ҳозирча аниқланмаган.
Аввалроқ, 2 октябрь куни Венесуэлага қарши ўйиндан (0:0) сўнг, жамоанинг асосий ҳимоячиси Ким Мин Жэ: "Ҳимоячиларга раҳмим келяпти. Ҳамма бирлашиб курашаётгандек туюлмади", – дея кескин фикр билдирган эди. Ярим ҳимоячи Хван Ин Бом эса ассоциация раҳбари йўқлиги ва вақтинчалик мураббийлар тизимини тилга олиб, кўзига ёш олган ҳолда: "Терма жамоада 9 йилдан бери ўйнаяпман, лекин кўп жиҳатдан ҳеч қандай ўзгариш бўлмади", – деган эди.
Бу ҳолат нафақат баъзи жамоадошларнинг майдондаги паст энергияси ва ҳимояга ёрдам бермаслигига қаратилган танқид, балки Шимолий ва Марказий Америкада бўлиб ўтган Жаҳон чемпионати атрофида йиғилиб қолган ички низоларнинг ҳам маҳсули сифатида кўрилмоқда. Жаҳон чемпионатида Жанубий Африка билан ўйиндаги муваффақиятсизликдан сўнг турнирни тарк этган жамоа ичида турли қарама-қаршиликлар юзага келган. Хусусан, 1992 йилда туғилган фахрийлар – Сон Хён Мин ва Ли Жэ Сон билан 1996 йилги авлод вакиллари ўртасида можароларни давом эттириш борасида келишмовчилик бўлган. 9 йилдан буён сардорлик қилиб келаётган Сон Хён Мин ҳам жамоа атрофидаги бу каби шов-шувларда масъулиятдан холи эмаслиги айтилмоқда.
