Биринчи таймнинг ўзидаёқ учрашувнинг энг яхши футболчиси бўлган хавбек, ушбу мавсумда илк бор тур мураббийига айланган мутахассис — Суперлигада 11-тур лауреатлари

"Championat.asia" ўтказилган баҳслар асосида тур лауреатларини аниқлади.

"Сурхон" посбони Артём Потапов "Championat.asia" сайти талқинига кўра 11-турнинг энг яхши дарвозабони деб топилди. 

Термизликлар дарвозабони ортда қолган турда кўп марта сэйв намойиш қилиб, "Металлург" устидан қозонилган ғалаба (1:0)да муносиб улуш қўшди.

"Навбаҳор" хавбеки Остон Ўрунов "Championat.asia" талқинида 11-турнинг энг яхши футболчиси дея эълон қилинди.  

22 ёшли ярим ҳимоячи "Бунёдкор" билан баҳсда 60 дақиқа ҳаракат қилгани ва кичик жароҳати борлигига қарамасдан, ўз дубли билан ўйин тақдирини ҳал қилди. У сайтимиз талқинига кўра 1-тайм тугаши биланоқ учрашувнинг энг яхши футболчиси деб топилди, бу бежиз эмас, албатта. Футболчи биринчи бўлимдаги самарали хатти-ҳаракатлари орқали жамоасига навбатдаги 3 очкони келтиришда катта ҳисса қўшди ва бу орқали сайтимиз экспертлари томонидан муддатидан олдин энг яхши бўлишга лойиқ кўрилди.  

"Навбаҳор" аъзоси Остон Ўруновнинг "Бунёдкор" дарвозасига киритган биринчи, жамоасининг эса тўртинчи тўпи "Championat.asia" талқинига кўра 11-турнинг чиройли голи (ВИДЕО) деб тан олинди. 

Наманганликлар хавбеки "Бунёдкор" билан учрашувда дубль қайд этди ва жамоасининг йирик ҳисобдаги ғалабасини таъминлади. 

"Навбаҳор" бош мураббийи Самвел Бабаян "Championat.asia" талқинига кўра 11-турнинг энг яхши мураббийи сифатида эътироф этилди.

Тажрибали мутахассис қўл остидаги "лочинлар" бу турда "қалдирғочлар"ни тор-мор келтиришди.