⚡️ Беларусь. Абдихолиқов Давидовнинг рекордини такрорлади. "Энергетик-БГУ" эса клуб тарихидаги энг яхши натижага яқин

Пешқадам “Шахтёр Солигорск” билан орадаги фарқ эса 2 очкони ташкил этмоқда.

Ўтган ўйинда дублга эришган Бобир Абдихолиқов чемпионат бу мавсумидаги голлари сонини 25 тага етказиб олди. 

У бир мавсум давомида мусобақада энг кўп гол урган легионер Сергей Давидов билан тенглашди. Россиялик футболчи 2001 йил “Неман” сафида худди шунча гол урганди. Умуман олганда эса мавсум давомида гол уриш бўйича Абдихолиқов ва Давидовдан олдинда фақатгина икки футболчи бор:

1. Андрей Хлебосолов - 34 (1996, "Белшина", Беларусь);

2. Роман Василюк - 31 (2000, "Славия", Беларусь).

Минскликлар чемпионат финишига қадар яна иккита учрашув ўтказади. Уларни 29-тур доирасида 6 ноябрда “Гомель” билан сафардаги ўйин ва 30-тур доирасида яна “Динамо” (Минск) билан дерби (12 ноябрь) кутмоқда. Жамоа кучли учликдан тушиб кетмаса, кейинги мавсум еврокубокларда қатнашади. Қайд этиш жоизки, "Энергетик-БГУ" ўз тарихида ҳали бирор марта чемпионатни топ-3'да якунламаган. 

Мусобақа тарихида совриндорлар қаторидан 14 та жамоа жой олган: БАТЭ, “Динамо” (Минск), “Шахтёр” (Солигорск), “Славия” (Мозир), “Белшина”, “Гомель”, “Днепр” (Могилёв), “Динамо” (Брест), “Витебск”, “Динамо-93” (Минск), “Неман”, “Партизан”, “Торпедо-БелАЗ” ҳамда “Минск”.

Маълумот ўрнида, Бобир Абдихолиқов Европада 2022/23 йилги мавсумида “Олтин бутса” учун давогарлар рўйхатида 4-ўринда бормоқда.