Бахтиёр Қамбаралиев: “Бугун “Локо” ютса чемпионлик сўнгги турда ҳал бўлади, акс ҳолда “Пахтакор” чемпион!”

- Бахтиёр ака, бугун чемпионатнинг марказий ва шу билан бирга чемпионликни ҳал қилувчи ўйини олдидан нима дейсиз?
- Бугунги об-ҳавонинг ноқулайлиги сабабли майдон ҳолати ҳам яхши бўлмайди. Бу нарса ўйинга салбий таъсирини ўтказмасдан қолмайди. Менимча ўйин дуранг билан интиҳо топса керак. Лекин ҳар икки жамоага ҳам очко керак. “Пахтакор”нинг захира ўйини борлиги улар учун катта пльюсдир.

- Ҳисоб қандай бўлишини тахмин қиляпсиз?
- 1:1 бўлса керак. Ҳар икки жамоа тенг кучга эга. Буни илгари ҳам суҳбатларимизда айтгандим. Лекин кўп нарса бугун аниқ бўлади. Чемпионлик менимча чемпионат охирига қадар давом этса керак. “Локомотив” бугун ютса барибир чемпионлик масаласи сўнгги турда аниқ бўлади. Аксинча “Пахтакор” ютадиган бўлса, “шерлар”ни чемпион деб ҳисоблайверинг. Яна ким билади дейсиз. Бу – футбол. Унда ҳамма нарса рўй бериши мумкин.

- Бугунги ўйинни хорижлик ҳакамлар бригадаси бошқариб боради. Бунга муносабатингиз қандай?  
- Шахсий фикрим: ўзимизнинг ҳакамларимиз ҳам яхши бошқарарди. Четдан олиб келиш шарт эмасди деб ўйлайман. Бир пайтлар Равшан Эрматовни Россия премьер-лигаси ўйинларига ҳам таклиф этишгани ҳақида гаплар чиққанди. Кўряпсизми ўзимизнинг ҳакамларга ҳам четдан таклифлар бўлмоқда. Шунинг учун бугунги учрашувда ҳам ўзимизни ҳакамларимиз ишлашса ёмон бўлмасди.

- Ўйинни қаерда кўрмоқчисиз?
- Уйда кўришга қарор қилдим. Хотиржам ва тинчроқ. Шуниси маъқул.


Исломбек Рустамбеков суҳбатлашди.