Бахтиёр Ашурматов: "Бугун таркиб танлашда хато қилдим деб ҳисоблайман"

"Афсуски охирги ўйинларда вазиятлардан фойдаланишда оқсаяпмиз, кўп имкониятлар бўлмоқда, аммо гол ура олмаяпмиз. Гол урмасангиз ғалаба қозона олмайсиз. Биринчи бўлимда ҳимояда ва майдон марказига кўп хатога йўл қўйдик, марказни рақибга бериб қўйдик. Бугун таркиб танлашда хато қилдим деб ҳисоблайман. Бунинг натижасида "Локомотив" устунликка эга бўлди. Гол ўтказгач, йигитлар ҳисобни тенглаштиришга ҳаракат қилишди. Йигитларга виждонан ўйнашгани учун раҳмат айтаман. Бу йилги мавсумда футболчиларим барча ўйинларда охиригача курашишмоқда. Тўғри мухлислар доим ғалаба қозонишимизни кутишади. Аммо ҳар доим ҳам ўйлаган ишларимиз амалга ошавермайди.

Олдинда иккита тур бор ва чемпионатни муносиб тугатишга ҳаракат қиламиз. Ундан кейин кубокда ҳам иштирок этамиз.

"Локомотив" Тимур Кападзе мураббий бўлганидан кейин ижобий томонга ўзгарганини барча кўриб турибди. Рақибни яхши ўргангандик. "Локомотив"ни ғалаба билан табриклайман.

“Пахтакор” билан ўйинда афсуски, Аваз Маматхўжаевни тўртта сариқ карточка туфайли майдонга тушира олмаган эдик. Мурод Холмуҳаммедов қанотда яхши ҳаракат қилганди. Бугун Музаффаровни марказга қўйдик ва қанотга Холмуҳаммедовни қўйдик. Бугун ҳам Холмуҳаммедов майдонда катта ҳажмдаги ишни бажариб берди. Ўз майдонимизда тўп тепганимиз сабабли бугун ҳужумкор бўлган ярим ҳимоячи Музаффар Музаффаровни майдонга туширгандим", - дейди Бахтиёр Ашурматов.