Анвар Бердиев: "Мусобақанинг финалига етиб келишимизни кўпчилик кутмаганди"

"Тўғрисини айтсам, жамоамизнинг мусобақанинг финал босқичига қадар етиб келишини кўпчилик кутмаганди. Фурсатдан фойдаланиб жамоамиз футболчиларига миннатдорчилик билдираман, улар майдонда борларини бериб ҳаракат қилишди. Тўғри финал учрашувида йирик ҳисобда ютқазиб қўйдик, лекин биз бундай фожеа ясаш ниятимиз йўқ. Мусобақа давомида камчиликларимизни кўриб олдик, албатта булар устида ишлаймиз. Насиб бўлса янги мавсумда "Истиқлол" ўз ўрнига эга бўлган жамоа сифатида намоён бўлади. Шу йўналишда ишлашда давом этамиз.

Ушбу турнир жамоамиз мавсумолди тайёргарлик доирасида жуда зарур эди. Мусобақа давомида бир қатор номдор ва кучли жамоалар билан ўйин ўтказиш орқали хато ва камчиликларимизни кўриб олдик. Бизга энг кераклиси мана шу турнир орқали футболчиларнинг ўз-ўзларига, хусусан ғалабага бўлган ишончларини шакллантириб олдик. Мусобақани иккинчи ўрин билан тугатдик, айтиш жоиз бўлса бу жамоамиз учун яхши натижа.

Эндиликда 3-4 кун жамоамиз футболчиларига кичик таътил берамиз, улар ҳар икки-уч кунда ўйинлар ўтказишди, чарчоқ бўлиши табиий хол. Бу йилги турнир аввагиларидан кўра анча кўтаринки руҳда ўтди, иштирокчи жамоаларга назар ташласангиз ҳам бу яққол кўзга ташланиб турибди. Тез орада машғулотларга киришиб, янги мавсумда ПРО-Лигада ҳам шу каби муносиб этишга ҳаракат қиламиз" - дейди Анвар Бердиев.

Бекзод Толибов ёзиб олди.