Андрей Канчельскис: "Ўзбеклар ривожланишяпти, биз эса аксинча"

Ўруновни шуғуллантирган "Навбаҳор" жамоаси бош мураббийи Андрей Канчельскис билан боғландик. "Манчестер Юнайтед" афсонаси, собиқ ўйинчисининг "Спартак"ка мослашиб кетиш имкониятларини ва Остонга тўсқинлик қилиши мумкин бўлган камчиликларини айтиб ўтди ва шу билан бир қаторда, РФУни кескин танқид қилди.

Ўруновнинг устунлиги
"Агар раҳбарлар ва мураббийлар штаби уни жамоада кўришни исташган бўлса, бу ўтишни ижобий баҳолаш мумкин. Мен Ўрунов билан ишлаганман, унинг имкониятлари ақбовар қилмас даражада ва истиқболли, агар унга тўғри йўналиш бериб ривожлантирсангиз, кучли футболчига айланиши мумкин.

Йигит яхши жисмоний хусусиятларга эга, техник жиҳатдан кучли, тезлиги бор, бирга бир вазиятда рақибни алдаб ўта олади. Агар бу фазилатлар ривожлантирилса, бу яхши трансфер. Бироқ у мухлислар босимига қандай бардош бериши, "Спартак" ундан қандай ва қаерда фойдаланиши - бу жумбоқ.

Остон ўзига қўйилган талаблар нима эканлигини, у ерда қандай мухлислар борлигини ва қаерда эканлигини тушуниши керак. "Спартак" - бу ҳудудий "Уфа" эмас, балки Россиянинг биринчи рақамли клуби. У бу психологик ҳужумга бардош берадими ёки йўқми – бу катта савол.

Айтганча, Ўрунов жуда яхши зарба бера олишини айтиб ўтиш лозим. Баъзан у кутилмаган зарбаларни йўллайди, кўпинча узоқ масофадан зарба беради ва хавфли вазиятларни ташкил қилади. У ўнг оёғида чапидан кўра яхшироқ ўйнайди".

Остоннинг камчиликлари

"Ўруновнинг бир нечта камчиликлари бор. Биринчидан, у ўз жамоаси томонда тўп билан ўйнашни яхши кўради. Рақибни алдашга киришиб кетиши, тўп билан муомала қилиши ва уни йўқотиши мумкин.

Биз уни марказдан олишга ҳаракат қилдик, у инсайд, қанот вакили, учинчи ҳужумчи сифатида ўйнаган. Терма жамоа унга ҳамма нарсани қилишига имкон берди. Фақат биз келганимизда у қайта тикланди ва ривожлана бошлади.
Унга эркинлик берилганида, бу жамоа учун минусга айланди. Мен ундан кўпроқ ҳужумда фойдаландим, чунки рақиб майдони томонда тўпни йўқотиш унчалик қўрқинчли эмас.

Ўруновнинг пас бериш билан боғлиқ муаммоси бор деб айтилади. Демак, ўргатиш керак. Мен унинг узатмалар билан боғлиқ муаммолари бор деб айтмайман. У, албатта, Фернандо эмас, лекин Тедеско штаби унинг ўйинларини томоша қилган ва унинг энг яхши фазилатларини қандай ишлатишни тушунишади. Ҳаммаси Остонни жамоада қандай қабул қилишларига ва футболчи катта клубдаги руҳий босимни қандай енгишига боғлиқ.
Яна бир ноқулай томони шундаки, у рус тилини ўрганиши керак, шунда мураббийларнинг кўрсатмаларини тушунади. Агар у "Спартак"даги муҳитга кўникиб кетса, тилни тезда ўзлаштириб олади."

Бошқа ўзбек футболчиларидан фарқи
“Ўрунов "Локомотив" сотиб олган Жалолиддиновдан моҳирроқ. Остон жисмоний тарафдан кучли ва яхши техникага эга.

Ўруновни Шомуродов билан таққослашингиз мумкин, аммо Элдор – тўпурар. Коронавирус туфайли юзага келган тўхталишлар унга бир оз таъсир қилди. Бу қийин, барчамиз тушунамиз. Бироқ Ўрунов учун бу фойдага ишлади.
Остонга омад, соғлик-саломатлик ва "Спартак"да ўз ўрнини топишини тилайман. Бу буюк клуб. У ерга ўтиш - ҳақиқатан жуда зўр. Бундай катта клубда ўйнаш қиммат туради".

Ўзбеклар "мода"си қаердан пайдо бўлди?

"Муносиб футболчилар Россия Премьер-лигасига борадилар. Рус мактабларида катта муаммо мавжуд. Қаллоблар ва дилетентлар бизнинг футболимизга халақит беришади...
Ҳамма нарса, ҳар доимгидек, пулга бориб тақалади, РФУда фирибгарлар ишлайди. Футболдан йироқ одамлар билан нима ҳақда суҳбатлашиш мумкин? Деярли ҳар бир рус клубида қаллоблар бор.
Собиқ Совет Иттифоқидан бўлган йигитларнинг Россияга келиши... Билмадим, мен Ўзбекистонда ишлайман ва кўряпманки, Хитой, Жанубий Корея ва Японияга кетаётган муносиб футболчилар бор. Улар ривожланишмоқда, аммо биз таназзулга юз тутмоқдамиз - мана бу сизга тўлиқ жавоб", - деди Канчельскис.

Манба: metaratings.ru