Алексей Евстафеев, Тошкентдаги тўқнашув қаҳрамони ва "Хоразм" дарвозабони - Про лига 11-тур лауреатлари

"Championat.asia" сайти талқинига кўра 11-турнинг энг яхши дарвозабони - Машҳур Муҳаммаджонов  ("Хоразм")

"Хоразм" жамоаси бу турда ўз майдонида "Қўқон-1912"ни қабул қилди. Муросасиз ўтган ўйинда мезбонлар посбони Машҳур Муҳаммаджонов маҳоратини кўрсатди ва дарвозаси даҳлсизлигини сақлаб қолишга эришди. "Хоразм" сўнгги маротаба 5-турда "Дўстлик" билан учрашувда шундай кўрсаткич қайд этганди. 

"Championat.asia" сайти талқинига кўра 11-турнинг энг яхши футболчиси -  Шерзод Қодиров ("Дўстлик")

Қайсидир маънода турнинг кутилмаган натижаси "Бухоро" - "Дўстлик" учрашувида қайд этилди. Пойтахт клуби чемпионат етакчисига 2 та гол урди ва ҳисобда дастлаб олдинда бораётганди, якунда эса мезбонлар ҳисобни тенглаштирди. Ўйиндаги "Дўстлик"нинг икки голига сўнгги баҳсларда ёрқин ўйин кўрсатаётган Шерзод Қодиров муаллифлик қилди. Шерзод Қодиров Алексей Евстафеев бошчилигидаги охирги 3 та баҳсда 4 та гол, 1 та ассист амалга оширди. "Бухоро" бу ўйинга қадар 1 та тўп олиб чиққан бўлса, "Дўстлик" бу ишни битта ўйинда икки маротаба уддалади. 

"Championat.asia" сайти талқинига кўра 11-турнинг энг яхши мураббийи - Алексей Евстафеев ("Дўстлик")

Про лигада жорий мавсумда дебют қилаётган “Дўстлик” “Бухоро” фонида кучсиз, нисбатан тажрибасиз жамоадек гавланаётганди. Лекин унутмаслик керакки, пойтахт клуби тажрибали мураббий Алексей Евстафеев қўлига ўтгач илк ғалабасини қўлга киритди, жамоа ўйинига мазмун кирди. Унинг шогирдлари 11-турда кучли рақибдан очко олишга муваффақ бўлди.