Айбек Нурбоев: “Шартномага қадар ҳаммаси яхши эди. Бироқ...”

- Айбек ака, “Бухоро”дан кетишингизни қандай изоҳлайсиз?

- Биласизми шартномага қадар ҳаммаси яхши кечаётганди. Раҳбарият ва бош мураббий билан муносабатим жуда илиқ эди. Бироқ битим имзоланадиган пайтга келганда, воқеалар ривожи тубдан ўзгариб кетди. Очиғи бундай бўлишини ўзим ҳам сира кутмагандим. Чунки бу йил ҳам “Бухоро” қолишни режалаштиргандим. Аммо бу хаёт. Унда шундай кутилмаган ходислар учраб туради. Буни тўғри қабул қилдим.

- Сўнгги лаҳзада мураббий билан чиқиша олмадингизми ёки раҳбарият билан моддий жиҳатни келиша олмадингизми?

- Моддий томондан. Кимдир мен ҳақимда салбий фикр билдириб, раҳбариятни чалғитган.

- Аниқ номни айта оласизми?

- Йўқ. Лекин ўзим учун билиб қўйдим.

- Кетиш олдидан Александр Мочинов билан гаплашдингизми?

- Александр Владимирович клубга келиб, иш бошлаган кунларидаёқ мен билан ҳамкорлик қилишни истаётганини билдирганди. Шунинг учун ҳам бу йил “Бухоро”да қолмоқчи эдим. Юқорида айтиб ўтганимдек, битта шахс мен ҳақимда уларга бошқача тушунтирган.

- Шундан сўнг сизни собиқ жамоангиз “Нефтчи”га ўтганингиз ҳақида эшитдик. Шу ростми?

- Ҳа, шундай. 18 январдан фарғоналикларнинг пойтахтдаги йиғинига келиб қўшилдим. Лекин ҳозирча расман келишувга эришмадик.

- Бу клубга сизни ким таклиф этди. Раҳбариятми ёки мураббий?

- Умуман олганда ҳаммаси жамоага қайтишимни истади. Ўзим ҳам собиқ жамоамни соғиндим шекилли, таклифни қабул қилиб машғулотларга қўшилдим (кулади).

- Олдингизда бундан бошқа вариантлар ҳам бормиди?

- Ҳа, ҳозиргача яна айрим клублар чақирмоқда.

- “Нефтчи”да қолишингиз неча фоизга аниқ?

- Бу масала яқин 2-3 кунда аниқ бўлади.

 

Исломбек Рустамбеков.