Аҳмаджон Мусаев - Ўзбекистон U-13 терма жамоаси бош мураббийи

ЎФФ ва "Терма жамоалар маркази" ушбу ёш тоифасидаги терма жамоани яхшироқ шакллантириш ва имкон қадар барча номзодларни кўздан кечириш учун иқтидорларни йиғиб, терма жамоани тузишга қарор қилди. Айни кунларда "Чиғатой" базасида истиқомат қилаётган жамоага Аҳмаджон Мусаев устозлик қилаётган бўлса, терма жамоа менежери сифатида Шуҳрат Мақсудов фаолият юритишни бошлади.

21 октябргача давом этадиган йиғинда жами 48 нафар футболчи синаб кўрилади. Йиғиннинг дастлабки 5 кунида 24, кейинги 5 кунида қолган 24 ўйинчи кўздан кечирилади. Ноябрь ойида эса ҳозирги йиғиндан сараланган ва янги номзодлар яна бир бор йиғинга чақирилади. Дастлабки йиғинда жами 6та назорат ўйини ташкил қилиш кўзда тутилган. 15 октябрь, пайшанба куни "Спартак" жамоасининг 2001 йилда туғилган ёшларига қарши назорат баҳси бўлиб ўтади. Учрашув "Жар" стадионида соат 11:00да бошланиши режалаштирилган.

Ушбу ёшдаги терма жамоа ҳар ойлик йиғинлар орқали шакллантириб борилиши кўзда тутилган. Номзодлар нафақат терма жамоа йиғини, балки клублари сафидаги учрашувларда ҳам мураббийлар штаби томонидан кузатиб борилади.