АГМК таътилни якунлади ва йиғинга киришди

"АГМК жамоаси бугундан Қибрайда тўпланди. 20 кунлик қишки таътилдан қайтган жамоамиз бугундан Қибрайдаги қароргоҳда тўпланди ва йил охирига қадар давом этадиган дастлабки йиғинни бошлади. Ҳордиқ чиқариб қайтган жамоамиз бугун куннинг иккинчи ярмида клуб қароргоҳида тўпланди ва янги мавсумга тайёргарлик доирасидаги илк йиғинга киришди. Дастлабки кунги машғулот енгил, асосан югуриш ва чигалёзди машқлари билан ўтказилди. Дастлабки йиғин доирасидаги машғулотларда Миржалол Қосимов бошчилигидаги мураббийлар штаби футболчиларнинг жисмоний ҳолатини тиклаш жараёнига кўпроқ эътибор қаратишни мақсад қилишган. Йил сўнггига қадар давом этадиган 6 кунлик машғулотларда футболчиларнинг жисмоний ҳолатини яхшилашга эътибор қаратилади. АГМК жамоасининг трансфер сиёсати, селекция ва таркибдаги ўзгаришлар борасида янги йил, яъни январь ойидан эътиборан бошланадиган иккинчи йиғин олдидан маълумотлар берилади. Ҳозирча таркиб борасида ўзгаришлар йўқ. Эртадан жамоамиз кунига икки маҳалдан шуғулланишни бошлайди. Мазкур йиғин 29 декабрга қадар давом этади ва шундан сўнг янги йил байрами муносабати билан футболчилар қисқа муддатли таътил берилади", - дейилади АГМК матбуот хизмати берган хабарда.