"Қизилқум": Иккинчи босқич машғулотлари бошланди, таркибда янгилар бор

Режага кўра, кончиларнинг мазкур ўқув-машғулот йиғини 25 январга қадар давом этади.

Ҳозирда бош мураббий Юрий Лукин қўл остида ўттизга яқин футболчи машғулотларда иштирок этмоқда. Янгиликлар хусусида тўхталадиган бўлсак, йиғинга Александр Антипов (“Спартак” Бухоро), Никита Свиридов (“Динамо” Самарқанд), Руслан Вагапов (“Металлург”), Шерали Жўраев (“Олмалиқ”) каби ўйинчилар таклиф қилинган.

Ўтган йилги кончилар таркибини фақат ижара асосида тўп сурган футболчилар тарк этишган, холос. Иккинчи даврада Жиззахнинг “Сўғдиёна” футбол клубидан келиб қўшилган ҳужумчи Хуршиджон Йўлдошев ҳам машғулотларда қатнашмоқда.

Моҳир ҳужумчи Владимир Шишелов (“Металлург” Новокузнецк, Россия) 8 январь тонггида юртимизга етиб келиши кутилмоқда.

Шунингдек, айни пайтда жамоа мураббийлар штаби ўтган мавсумни бошқа жамоаларда ўтказган бир қатор тажрибали футболчилар билан музокаралар олиб боришмоқда. Уларнинг кимлар эканлиги яқин кунларда маълум бўлади.

Режага кўра, “Қизилқум” футбол клуби мураббийлар штаби ва жамоа аъзолари 8 январь куни пойтахтимизга сафар қилади. 9 январда эса Чиғатойдаги “Футбол-МЕД” спорт-соғломлаштириш марказида тиббий кўрикдан ўтадилар.