"Андижон" бош мураббийи "Пахтакор"га қарши ўйин учун режани айтиб берди

"Ҳар тарафлама мағлубиятга учрадик. Биринчи бўлимда ёмон ўйнамаётган эдик. Лекин иккита гол ўтказиб юборганимиздан кейин режаларимиз бузилиб кетди. Ҳавода тўп учун курашларда мағлуб бўлдик. Уч нафар буйдор ҳимоячиларимиз билан ҳам ҳавода устунлик қилолмадик. Рақиб майдонни ҳар бир қисмида устунлик қилди.

- "Андижон" жамоасида ишлаш қийинчилик туғдирмаяптими? Ҳар ҳолда "Машъал" қизиқарлироқ эди.
- Афсуски ҳозирча ғалабалар кам. Қийинчилик ҳамма жойда бор. Муаммо ҳар бир клубда бўлади. Шу боис сабр қиламан, ишлашда давом этамиз, камчиликларни бартараф қиламиз ва натижа албатта бўлади.

- Бугунги ўйин учун режа қандай эди?
- Жамоа таркибидаги бор футболчилар билан ўйнаймиз. Ҳужумни кучайтиришни истагандик, аммо уй қуришдан олдин пойдевор қўйилади. Шу боис дастлаб ҳимояни кучайтирдик. Ҳимоядан тез ҳужумга ўтиш устида кўп ишладик. "Навбаҳор" билан ўйиндан бошқа баҳсларда буни уддалаб келаётгандик. "Пахтакор" билан ўйинга режамиз майдон марказида кўпроқ футболчига бўлиш, қанотларни рақибга бериш эди. Бўйдор уч ҳимоячи билан ўйнадик, шунинг эвазига ҳаводаги устунликка эришмоқчи эдик. Афсуски қанотлардан узатилган тўпларни ҳимоячиларимиз деярли қайтара олишмади, ҳаводаги курашларни мезбонлар ютаверишди. Иккинчи таймда яна 4 ҳимоячи тактикасига ўтдик, аммо рақиб бўш зоналардан унумли фойдаланди. Натижа адолатли.