Хорватияда ўйнаган биринчи ўзбекистонлик футболчи 28 ёшда

Темурхўжа Абдухолиқов Ўзбекистон чемпионатининг моҳир ҳужумчиларидан бири. У меҳнат қилишдан толмайди ва доим олдинга интилади. Шуни айтиш лозим, Абдухолиқов Хорватия чемпионатида тўп тепган дастлабки ўзбекистонлик футболчи ҳисобланади. 

Фаолиятини "Бунёдкор-2" сафида бошлаган Темурхўжа 2011 йил "Пахтакор"га бориб 2013 йил охиригача шу клуб шарафини ҳимоя қилади. 2014 йил эса Хорватияга йўл олиб, "Хайдук" билан шартнома имзолайди. Аммо Абдухолиқовнинг Европадаги фаолияти ёрқин кечмайди. 

Шундан сўнг ҳужумчи Ўзбекистонга қайтиб 2015 йил "Локомотив" сафига келиб қўшилади. Айтиш мумкинки, ҳозиргача Темурхўжанинг энг ёрқин дамлари "Локомотив"да кечган ва кечмоқда. Айниқса 2016 йилги мавсум унинг учун унутилмас ҳисобланади. Чунки айнан шу йили 22та гол билан Ўзбекистон чемпионати тўпурарига айланади. Бундан ташқари "Локомотив"нинг Осиё чемпионлар лигаси чорак финалига қадар етиб боришида муносиб ҳисса қўшади. 

Темурхўжа Абдухолиқов уч бор Ўзбекистон чемпионлигини қўлга киритган. Бир марта "Пахтакор" сафида (2012) ва икки бор "Локомотив" таркибида (2016, 2018). Шунингдек икки бор Ўзбекистон Кубогида зафар қучган (2011, 2016). 2015 ва 2019 йилларда эса Ўзбекистон Суперкубогини ҳам қўлга киритган. 

Темурхўжа 2016 йил "Локомотив" сафидаги ёрқин ўйинлари туфайли қатарликлар эътиборини тортади ва 2017 йилнинг бошида Санжар Шоаҳмедов билан биргаликда Қатарга йўл олиб, "Ал Сайлия" билан шартнома имзолайди. Унинг араб мамлакатидаги фаолияти ҳам эсда қоларли бўлган деб бемалол айта оламиз. "Ал Сайлия" таркибида 32 учрашувда майдонга тушган ҳужумчи 17 бор гол уришга муваффақ бўлади. 

Ҳозирги пайтга келиб унинг Ўзбекистон клублари ва миллий терма жамоада киритган голлари 98тага етган. Яна иккита голдан сўнг Темурхўжа Абдухолиқов ҳам Геннадий Красницкий номидаги тўпурарлар клуби аъзосига айланади. Биз моҳир ҳужумчига тезроқ иккита гол уриб 100лик маррани забт этишини тилаб қоламиз.

"Локомотив" ПФК матбуот хизмати.