Тошкентда Марказий Осиё Футбол Ассоциацияларининг навбатдан ташқари конгресси бўлиб ўтди

Ушбу Конгрессда Ассоциация аъзолари минтақада футболни ривожлантириш бўйича масалаларни ҳал қилишди ва қўмиталар таркибини аниқлаб олишди. Бундан ташқари, 2016 йил иккинчи ярми учун эркаклар (U-19) ва аёллар (U-18) мусобақалари борасида келишувга эришилди.

Конгресс доирасида делегатлар Ўзбекистон Миллий Олимпия Қўмитаси ва Спорт медицинаси илмий тадқиқот марказига ташриф буюришди.

Эслатиб ўтамиз, 2015 йил январь ойида Австралиянинг Мельбурн шаҳрида ОФКнинг навбатдан ташқари конгресси бўлиб ўтганди. Унда қитъани бешта минтақавий Ассоциацияларга ажратиш таклифи берилганди. Марказий Осиё минтақасига Ўзбекистон, Қирғизистон, Тожикистон, Туркманистон, Афғонистон ва Эрон мамлакатлари аъзо бўлди. Кейинроқ CAFA қароргоҳи Тошкентда бўлиши келишиб олинди. ЎФФ президенти Мираброр Усмонов Марказий Осиё Футбол Ассоциацияси раҳбари ҳисобланади.

Конгрессда Ўзбекистондан ЎФФ вице-президенти Сардор Раҳматуллаев ва CAFA бош котиби Аваз Максумов иштирок этишди.