Сардор Азимов: "Ўйлайманки, бу Қўқондаги охирги ғалабамиз бўлмайди"

Майдон эгалари жорий мавсум ҳисобидан илк бор ўз майдонларида ғалабани тантана қилишди. "Қўқон-1912"нинг голларига Иван Йосович ва Сардор Азимов муаллифлик қилди. Ўйиндан сўнг иккинчи гол муаллифи Азимов сайтимизга фикрларини билдирди. 

"Биз ҳар бир ўйинга рақибдан келиб чиқиб бир ҳил тайёргарлик кўрамиз. Суперлигада кучсиз жамоа қолмаган. Ҳар бир клуб очко учун курашмоқда. Ўз майдонимиздаги узоқ кутилган ғалабани қўлга киритганимиздан хурсандмиз. Ўйлайманки бу охиргиси бўлмайди. Яна ғалабалар қозониб мухлислар ишончини қайтаришга ҳаракат қиламиз. 

"Сурхон" ўз ўйинини топиб олганидан хабаримиз бор эди. Назарий машғулотларда сўнгги учрашувларини кўриб диққат билан ўрганиб чиққандик. Мураббийлар кўрсатмасини тўғри бажарганимиз самара берди.

Кўрган бўлсангиз олдинги беллашувларда ҳам комбинацион футбол кўрсатаётгандик. Рақиблардан келиб чиқиб мураббийларимиз тактика танлашади. "Сурхон" билан баҳсда стандарт вазиятлардан фойдаланишга уриндик.

Голни ноодатий тарзда нишонлашни ўтган мавсумдан бошладим. Жорий йилда ҳам буни давом эттирмоқдаман. Чунки Санжарбек деган ёш укам бор. Купега келсак, инстаграм ижтимоий тармоғида Dili.me деган блогерни кўпчилик яхши танийди. Дастлаб кузата туриб купе ўйини ёқиб қолди. Ўшанда мен ҳам кўриб амалга ошириш истаги пайдо бўлди",- дейди Сардор Азимов.