Руни машғулотларда ёш футболчига жароҳат етказиб, уни уч ойга сафдан чиқарди

"Дерби Каунти" клуби бош мураббийи Уэйн Руни машғулотлар пайтида 20 ёшли ярим ҳимоячи Жейсон Найтга оғир жароҳат етказиб қўйди. Руни футболчилар етишмаётганлиги сабаб машғулотларда қатнашаётганди. Руни томонидан ташланган нотўғри "подкат" натижасида "Дерби"нинг энг умидли футболчиларидан бири уч ойга сафдан чиқди. 

"Дерби Каунти"нинг ушбу машғулотларда тўққизтагина футболчи иштирок этаётганди. Бошқа футболчилар эса клубни тарк этишга улгуришган. Клуб трансферлар чекловига учраганини эслатиб ўтиш лозим. Улар фақат маоши чегараланган эркин агентларни рўйхатдан ўтказа олиш ёки футболчиларни ярим мавсумга ижарага олиш имкониятига эгалар.