Миржалол Қосимов: "Қизилқум" "иккинчи рақам" билан ўйнаб ғалаба қозонди"

"Бугун 1:3 ҳисобида имкониятни бой берган бўлсак-да, у қадар ёмон ўйнамадик, деб ўйлайман. Ўйиннинг илк дақиқаларидан гол ўтказиб юборган бўлсак-да, биринчи бўлимда бир қатор имкониятларга эга бўлдик. Масалан, Расул Йўлдошев ва Жасур Ҳасановда вазиятлар бўлди. Лекин улардан унумли фойдалана олмадик. Рақиб эса хавфли вазиятларни самарали якунлай олди ва якунда ғалабага эришди. Ушбу ғалаба билан “Қизилқум” жамоасини табриклайман", - дейди Миржалол Қосимов.

- Рақиб иккала голни ҳам қанотдан урди. Бу тасодифга ўхшамаяпти...
- Биринчи гол урилганида менга ўйиндан ташқари ҳолатдек туюлди. Иккинчи голда ҳам йўқ жойдан қоида буздик ва жарима тўпидан гол ўтказдик. "Қизилқум" бугун иккинчи рақам остида ўйнаб ҳам, қарши ҳужумлардан унумли фойдаланди.

- Бугун Элгужа Григалашвили ва Медина Смит яхши ўйнашди. Смит дебют қилди. Улар ҳақида билармидигиз?
- Албатта Элгужа ўтган йил Суперлигада ўйнаган. Смитнинг эса назорат учрашувлардаги ҳаракатларини кўриб чиққанман. Тезкор ўйинчи эканлигини, тўп билан яхши муомала қилишини билардик. Улар бугун катта ҳажмдаги ишни бажаришди.