Эвра: "Бир куни мухлисларга қарамасдан ўтиб кетдик, Фергюсон эса бизга бақирди"

"Бир куни мавсумолди турнирдаги ўйинни тугатдик ва автобусга кетаётгандик. Жуда қаттиқ чарчагандим. Тўғрисини айтаман: йўлда жуда кўплаб мухлислар бизни кутиб туришганди, биз эса ўзимизга шундай дедик: "Агарда кимдир автограф беришни истамаса, ҳеч ким буни қилиши шарт эмас".

Автобусга кириб кетдик. Кейин эса ойнадан Сер Алекс Фергюсон барчага автограф бераётганини кўрдик. У тахминан 45 дақиқа мобайнида барчага ўз дастхатини улашди. Ўшанда мен: "Йигитлар, биз тамоммиз. Сер Алекс автобусга чиқиб, барчани ўлдиради", - дегандим.

У автобусга келди ва бизга қараб: "Тушунмадим, ўзларингни ким деб ўйлаяпсиз? Бу одамлар орқали маош оласизлар! Улар сизларни кўриш учун бу ерга келишди. Ҳамманг пастга туш!". Биз пастга тушдик ва барча мухлислар билан расмга ҳам тушиб, дастхат улашдик", - деди Эвра.