Анри Салоҳ ҳақида: "Ливерпуль"да муаммолар бўлиб турганда ва ўзинг натижа кўрсатмаётган пайтда фақат ўзинг ҳақингда гапириш ярамайди. Мен "Барса"да ўйнамаётганимда буни Пепнинг юзига айтганман, оммага эмас. Жамоани ҳимоя қилиш керак"

Француз Салоҳнинг вазиятини ўзининг 2009/10 йилги мавсумда "Барселона"даги ҳолати билан таққослади, ўшанда у "Вильярреал"га қарши ўйин таркибига киритилмаган эди.

Эслатиб ўтамиз, "Ливерпуль" вингери АПЛ доирасидаги "Лидс"га қарши ўйинни (3:3) тўлиқ захира ўриндиғида ўтказди, у олдинги иккита баҳсни ҳам захирада бошлаган эди. Учрашувдан сўнг Салоҳ клуб ва бош мураббий Арне Слотни танқид қилди: "Мен клуб учун шунча иш қилдим, улар эса мени "автобус тагига итаришди". Африка Кубоги олдидан хайрлашаман – кейин нима бўлишини билмайман". 33 ёшли мисрлик футболчи ЕЧЛ доирасидаги "Интер"га қарши баҳс (1:0) қайдномасига киритилмади.

"Ҳеч ким Мо Салоҳнинг футболда нималарга эришгани ҳақида гапираётгани йўқ. Биз, менинг назаримда, у хато қилган вазиятлар ҳақида гаплашяпмиз. Жамоада муаммолар бор пайтда ўзининг шахсий вазияти ҳақида очиқчасига гапириш мумкин эмас.

Буни кийиниш хонасида қилиш керак. Мен шундай қилганман. Кийиниш хонасига кириб, ҳамма нарсани остин-устун қилганман. Мураббий хонасига бориб шикоят қилганман.

Мен "Барселона"да бўлганимда, жамоа билан бирга юрардим, мени эса трибунага ўтқазиб қўйишарди. Бу ҳақда гапирганимни эшитганмисиз? Йўқ... Бунгача биз треблни ютгандик, лекин мен яхши натижа кўрсатмаётгандим, агар яхши натижа кўрсатмасанг, бошқа бировга имконият яратасан.

Ўшанда мен бордим, стадионга келдик ва мен трибунада ўтирибман. Мен шовқин кўтариб, эътиборни ўзимга қаратаманми, матбуот билан гаплашаманми? Мен ўйинда кўп нарсага эришганман, лекин жамоа биринчи ўринда. Агар бирор нарса айтишим керак бўлса, шундай қилдим. Мен [мураббий] Пеп [Гвардиола]га бўлаётган воқеалар ҳақида нима ўйлаётганимни айтдим, лекин омма олдида эмас.

Ўз жамоангизни ҳимоя қилишингиз керак – ҳар қандай ҳолатда, доимо. Мен унинг гапириш истагини, ҳафсаласи пир бўлганини тушунаман. Лекин бунинг қандай ва қачон қилинганини тушунмаяпман. Мен учун бунда мантиқ йўқ. Бу нотўғри бўлди, одамлар муносабатлар ҳақида гапирганда, мураббий футболчидан истайдиган ягона нарса – у яхши натижа кўрсатишидир.

Агар натижа кўрсатмасанг, ўрнинг хавф остида қолади. Айниқса "Ливерпуль" каби клубда бу ўринни эгаллаш сенга кафолатланмаган... Бу яна унинг нималарга эришгани билан боғлиқ эмас. Такрорлайман – мен Мо Салоҳни яхши кўраман. Унинг футболда қилган ишлари менга ёқади. Бу бошқа мавзу, чунки бундай нарсалар ҳақида бу тарзда гапириш қабул қилинмаган", – деди Анри.