Yosh “qaldirg'och”larning birinchilikdagi natijalari

7-tur doirasida “Bunyodkor-A” safarda “Lokomotiv” mehmoni bo'lgan bo'lsa, “Bunyodkor-B” akademiya maydonlarida “Spartak” jamoasini qabul qildi. 8-turda esa “Bunyodkor-A” “Istiqlol” bilan o'z maydonida uchrashgan bo'lsa, “Bunyodkor-B” RKOR uyiga safar qildi. Bevosita o'yinlar tafsilotiga to'xtalib o'tsak...

7-tur o'yinlari
2003 yil
“Lokomotiv” - “Bunyodkor-A” 0:1
“Bunyodkor-B” - “Spartak” 1:0

Jamoalarning eng kichik yosh toifasidagi tarbiyalanuvchilari o'yinlarida minimal hisoblar qayd etildi. “Bunyodkor-B” o'z uyidagi o'yinda garchi raqibga nisbatan ancha kuchliroq o'yin namoyish etgan bo'lsa-da, vaziyatlardan samarali foydalanish borasida kamchiliklarga duch keldi. Natijada o'yindagi ustunlik bitta to'p farqini tashkil etdi, xolos... “Bunyodkor-A” va “Lokomotiv” bahsida esa o'yin teng kurashlar ostida kechdi. Har ikki jamoa vakillari o'z omadini raqib jarima maydonidan qidirdi. O'ziga xos murabbiylar “o'yin”iga aylangan bahsda uchrashuv taqdirini bitta gol hal etdi – 0:1... “Bunyodkor-A” foydasiga!

2002 yil
“Lokomotiv” - “Bunyodkor-A” 0:4
“Bunyodkor-B” - “Spartak” 1:0

2002 yilda tavallud topgan tarbiyalanuvchilar o'yinida “Bunyodkor-A” raqibga aslo imkoniyat qoldirmadi. SHu kuni o'yin to'liq yosh “qaldirg'och”lar ustunligida o'tdi va bu ustunlik hisobda ham o'z aksini topdi – 0:4! O'z maydonida o'ynagan “Bunyodkor-B” vakillari esa o'z tengqurlarini 1:0 natijasi bilan mag'lubiyatga uchratishdi. Etiborlisi, o'yindagi yagona gol uchrashuvning birinchi daqiqasidayoq “Spartak” darvozasidan joy oldi.

2001 yil
“Lokomotiv” - “Bunyodkor-A” 3:1
“Bunyodkor-B” - “Spartak” 1:1

Afsuski, 2001 yilda tug'ilgan bolalardan iborat har ikki jamoamiz 7-turda ishonchsizroq o'yin namoyish etishdi. “Bunyodkor-A” vakillari o'z darvozalaridan uchta to'p o'tkazib, faqatgina bir bora javob qaytarishga muvofaq bo'lishdi. O'z maydonida spartakchilarni qabul qilgan “Bunyodkor-B” o'z raqibiga bir ochko ulashdi, desak xato bo'lmaydi. O'yindagi har ikki gol birinchi bo'limda darvozalar to'ridan joy oldi – 1:1!

2000 yil
“Bunyodkor-B” - “Spartak” 0:0

“Bunyodkor-B” va “Spartak”ning keyingi yosh toifasidagi jamoalari o'yini ham durang bilan yakunlandi. Bu o'yinda golli vaziyatlar anchagina sodir etilgan bo'lsa-da, futbolchilar oxirgi nuqtani qo'yishda xatolarga duch kelishdi. “Lokomotiv” va “Bunyodkor-A”ning 2000 yil va 1998 yilda tavallud topgan jamoalari o'yini boshqa muddatga qoldirildi.

1999 yil
“Lokomotiv” - “Bunyodkor-A” 0:1
“Bunyodkor-B” - “Spartak” 2:1

Bu yosh toifasidagi har ikki jamoamiz irodali g'alabaga erishdilar. “Bunyodkor-A” futbolchilari bu o'yinda raqibga nisbatan kuchliroq o'yin ko'rsatib, muhim uch ochkoning egasi bo'lishdi. O'yindagi yagona gol Jahongir Abdusalomov hisobiga yozildi. “Bunyodkor-B” esa irodali g'alaba sohibi bo'ldi. Garchi ular birinchi bo'limdan so'ng “Spartak”ka 0:1 hisobida yutqazayotgan bo'lsa-da, ikkinchi taymda ishonchli o'yin ko'rsatib g'alabani o'z tomonlariga og'dirib olishdi – 2:1!

1998 yil
“Bunyodkor-B” - “Spartak” 0:1

SHu kuni spartakchilar yagona g'alabani eng katta yosh toifasidagi futbolchilar bahsida qo'lga kiritishdi. Birinchi bo'limda penaltidan kiritilgan gol mehmonlarga g'alaba keltirdi.

8-tur o'yinlari
2003 yil
“Bunyodkor-A” - “Istiqlol” 8:0
RKOR - “Bunyodkor-B” 1:0

8-tur o'yinlarini “Bunyodkor-A” jamoasi yirik hisobdagi g'alaba bilan boshladi. “Istiqlol”ni qabul qilgan yosh “qaldirg'och”lar raqib posbonini 8 (!) bora o'z darvozasidan to'p olib chiqishga majbur etishdi. Hisobdan ham malumki, mehmonlar bu o'yinda raqibga nisbatan hech nima qila olishmadi. RKOR mehmoni bo'lgan “Bunyodkor-B” vakillari esa kichik hisobda mag'lubiyatga uchrashdi. Birinchi bo'limda belgilangan penalti o'yin taqdirini hal qildi.

2002 yil
“Bunyodkor-A” - “Istiqlol” 11:1
RKOR - “Bunyodkor-B” 1:2

“Bunyodkor-A” jamoasining gollar shousi keyingi o'yinda ham davom etdi. 2002 yilgi tarbiyalanuvchilar o'yinida jami darvozalarga 12 (!) ta to'p kiritildi. SHundan 11 tasini “Bunyodkor-A” futbolchilari raqib posboniga “sovg'a” qilishgan bo'lsa, bitta gol “Istiqlol” hisobiga yozildi. “Bunyodkor-B” ham safardagi uchrashuvda uch ochkoni qo'lga kiritdi. Ular RKOR darvozasiga ikkita to'p kiritib, o'z darvozalaridan bitta to'p olib chiqishdi. Yakuniy hisob – 1:2.

2001 yil
“Bunyodkor-A” - “Istiqlol” 3:0
RKOR - “Bunyodkor-B” 0:1

“Bunyodkor-A”ning g'alabali odimlashini bu yosh toifasidagi tarbiyalanuvchilar ham davom ettirishdi. Maydon markazidagi ustunlik, vaziyatlar yaratish va ulardan samarali foydalanish koefficienti mezbonlar ustunligini taminlab berdi. Birinchi taymda kiritilgan uchta gol bunyodkorchilarga g'alaba keltirdi. RKOR maydonida kechgan o'yinda esa “Bunyodkor-B” futbolchilari 0:1 hisobida g'alaba bilan qaytishdi. Bu o'yin hujumkor ruhda o'tgan bo'lsa-da, har ikki jamoa imkoniyatlardan foydalana olmadi. Yagona gol standart vaziyat natijasida RKOR darvozasidan joy oldi.

2000 yil
“Bunyodkor-A” - “Istiqlol” 4:0
RKOR - “Bunyodkor-B” 0:3

“Bunyodkor-A” va “Istiqlol”ning bu yosh toifasidagi jamoalari o'yinida mezbonlar mehmonlarga hech qanday imkoniyat qoldirmadi – 4:0. O'yin borasida ham, taktika va individual harakatlar borasida ham mezbonlar ustunlik qilishdi. Maydonning har qarichi yosh “qaldirg'ochlar” nazoratida bo'ldi. “Bunyodkor-B” vakillari ham mehmonda ishonchli g'alabani qo'lga kiritishdi. Javobsiz uchta gol RKOR ustidan zafar qozonishga kifoya qildi.

1999 yil
“Bunyodkor-A” - “Istiqlol” 3:1
RKOR - “Bunyodkor-B” 3:3

“Bunyodkor-A”ning zafarli yurishi davom etib, mehmonlar yana bir bor mag'lubiyatni tan olishga majbur bo'lishdi. Bu o'yinda yarim himoyachilar asosiy ishni bajarib berishdi. Aynan ular tomonidan kiritilgan gollar mezbonlarga g'alabani taqdim etdi. RKOR maydonida kechgan o'yinda esa jangovar durang qayd etildi. Hisob haqiqatda o'yinga mos tushdi. Tinimsiz hujumkor ruhda o'tgan o'yin darvozalarning olti bor nishonga olinishi bilan yakunlandi.

1998 yil
“Bunyodkor-A” - “Istiqlol” 9:0
RKOR - “Bunyodkor-B” 3:2
“Bunyodkor-A”ning “Istiqlol” uchun o'ziga xos yana bir “master-klass”i... O'yin boshidanoq mezbonlar to'p nazoratini o'z qo'llariga oldilar. Maydon markazidagi ustunlik, raqib jarima maydonchasidagi faol harakatlar o'z natijasini bermay qolmadi. O'yinni kuzatgan odamga go'yo mezbonlarning har bir hujumi gol bilan yakunlanayotgandek taasurrot uyg'onardi. “Bunyodkor-A” hech bir jabhada mehmonlarga imkoniyat qoldirmadi – 9:0! “Bunyodkor-B” vakillari esa qiyin kechgan o'yinda imkoniyatni boy berishdi – 3:2... Bu o'yinda yosh bunyodkorchilarga ozgina xarakter etishmadi.

Sanjar Ismatov