Yaponiyaning qaysi jihatlariga etibor berishimiz kerak?

Yaponiya - Turkmaniston

Yaponiya terma jamoasi Osiyo Kubogini Turkmanistonga qarshi bahs bilan boshladi. Qo'shnilarimiz ko'pchilik bo'lib himoyada o'ynagani tufayli yaponiyaliklar hujum amalga oshirishda muammolarga duch kelishdi. Hujumda boshi qotgan raqibimiz himoyada beetiborlik qildi va Arslanmurat Amanovning uzoqdan zarba berishiga yo'l qo'yishdi va hisob ochildi.
SHoshib qolgan Yaponiya futbolchilari jamoaviy harakatlar bilan hisobni tenglashtira olishmadi va birinchi bo'lim qo'shnilarimizning g'alabasi bilan yakun topdi.
Jarima maydonchasiga kira olmayotgan yaponiyaliklar uzoq masofadan omadini sinashni boshladi, biroq zarbalar darvoza to'riga borib tushmadi.

56-daqiqada Yuya Osakoning individual mahorati tufayli hisob tenglashdi. Uchrashuvning burilish nuqtasi aynan shu gol bo'ldi. Yana hisobda oldinga chiqib olishni istagan Turkmaniston terma jamoasi futbolchilari himoyada xatolarga yo'l qo'ya boshlashdi va shunday xatolardan biri golga aylandi. Yaponlar qo'shnilarimizning sarosimaga tushib qolganidan foydalanib, uchinchi golni ham urishdi va irodali g'alabaga erishishdi.

Ummon - Yaponiya

Kunchiqar yurt vakillari Ummon bilan bahsda kombinacion hujumga tayandi. Yaponiyaliklar raqibning qanot himoyasini diqqat bilan o'rganib, o'ziga hos yo'l tutishdi. Ular ko'proq o'ng qanotdan erlatib "prostrellar" berishdi. CHap qanot esa havodan bo'ladigan uzatmalar uchun xizmat qildi. Yaponiya terma jamoasining o'nn qanotdan amalga oshirgan hujumlari juda xavfli tus oldi. Bazida himoyachilar  va darvozabon goldan qutqarib qolgan bo'lsa, bazida omad ular tomonda bo'lmadi.
Yaponiyaliklar hisobni penalti tufayli ochishdi. Genki Xaraguchi professional aktyorlardek rol o'ynab, hakamni qoida buzilganiga ishontirdi. Xaraguchining o'zi 11 metrlik jarimani golga aylantirdi.
Bugungi raqiblarimiz Ummonga qarshi o'yinda ko'proq jarima maydonchasi ichiga kirib zarba berishga urinishdi. Bunday zarbalar qaytarilsa yapon hujumchilari ortida ikkinchi zarbani amalga oshiradiganlar turdi. Yaponiyaliklarning ushbu Osiyo Kubogidagi 4ta golining 3tasi jarima maydonchasi ichidan olingan, 1tasi esa penalti.
Ikkinchi qavatdagi kurashda kuchlar teng keldi, bu borada Yaponiya raqibidan kuchli ko'rinmadi.

Yaponiya terma jamoasining kuchli tomonlari
1. Yaponiyaliklarning ko'plab muvaffaqiyatli hujumlari qanotlardan amalga oshiriladi.
2. Raqibimiz hujumni jarima maydoni ichida yakunlashga harakat qiladi, bu gol urish imkoniyatini oshiradi.
3. Yaponiya terma jamoasi futbolchilari individual mahorati bo'yicha biznikilardan biroz ustun.

Yaponiya terma jamoasining kuchsiz tomonlari
1. Yaponiyaliklar hisobda orqada bo'lishsa, futbolchilar ko'proq jamoaviy emas, individual harakatlarga tayanishadi.
2. Raqibimiz ikkinchi qavatda biznikilardan biroz kuchsiz.