Xet-trikka erishgan hujumchi, mag'lub bo'lgan darvozabon, Rossiyadan qaytgan futbolchi va "Surxon" ustozi: Superligada 7-tur laureatlari

Championat.asia o'tkazilgan bahslar asosida tur laureatlarini aniqladi.

"Bunyodkor" posboni Suhrobjon Sultonov Championat.asia sayti talqiniga ko'ra 7-turning eng yaxshi darvozaboni deb topildi. 

O'tgan turda ham eng yaxshi darvozabon bo'lgan Sultonov "Surxon"ga qarshi bahsda ham ko'plab seyvlar namoyish etdi. Garchi jamoasi mag'lub bo'lsa-da Sultonovni eng yaxshi deb topdik.  SHunday qilib "Bunyodkor" darvozaboni bu mavsum uchinchi marta eng yaxshi posbon bo'ldi.  

"Andijon" legioneri Rubin Xebay Championat.asia talqiniga ko'ra 7-turning eng yaxshi futbolchisi deya elon qilindi.

"Metallurg"ga qarshi bahsda 3ta gol urgan va bitta golli uzatma bergan Xebay jamoasining yirik g'alabasiga katta xissa qo'shdi. Yakunda "Andijon" 5:0 hisobida zafar quchdi va 11 yildan so'ng bitta o'yinda 5ta gol urdi.

"Navbahor" yarim himoyachisi Oston O'runovning "Turon" darvozasiga urgan goli Championat.asia talqiniga ko'ra 7-turning chiroyli goli (VIDEO) deb topildi.  

Autdan tashlangan to'pni Abduholiqov O'runovga qulay tarzda uzatib yubordi, u yog'iga esa Oston tezkor reyd bilan jarima maydoniga kirib gol urishga erishdi.  

Sergey Tokov Championat.asia talqiniga ko'ra 7-turning eng yaxshi murabbiyi sifatida etirof etildi.

Peshqadamlardan biri bo'lgan "Bunyodkor"ga qarshi bahsda "Surxon" 1:0 hisobida g'alabaga erishdi.  "Qaldirg'ochlar"ning mavsumda ilk bor maydonni boshlarini egik holda tark etishlariga sababchi bo'lgan Sergey Tokov boshchiligidagi murabbiylar shtabi eng yaxshi deb topildi.