Viktor Jalilov: "Bugun hech bir jamoa g'alabaga loyiq emasdi, shekilli"

- O'zlaring guvohsizlar, shiddatli o'yin bo'ldi. Har bir jamoa xato qilmaslikka harakat qildi. CHunki bu kabi o'yinlarda yagona gol o'yin taqdirini hal qilishi mumkin. Bitta golni ular urdi, bitta golga biz mualliflik qildik. Bugun kimdir xatoga yo'l qo'yganida mag'lubiyatga uchrashi aniq edi. Nazarimda bugungi natija haqqoniy bo'ldi. Har ikki jamoada ham gol urish uchun imkoniyatlar ko'p edi. Aftidan, bugun hech bir tomon g'alabaga loyiq emasdi, shekilli, - dedi Viktor Jalilov.

- Nega boshqa darvozabonlar xizmatidan foydalanmayapsiz?

- Asosiy darvozabonimiz O'tkir Yusupov hisoblanadi. Davronovni zaxira posboni sifatida jalb qilganmiz. Kubok o'yinlarida uni sinab ko'rmoqchi edik, lekin unda barmog'idan olgan jarohat bor edi. Hozir ham uni tarkibga jalb etish so'roq ostida, lekin tavakkal qilib qaydnomaga kiritdik. Rahimjon asosiy tarkib bilan doimo mashg'ulotlarda qatnashib kelmoqda.

- “Mashal” klubi tomonidan yaratib berilgan shart-sharoitlardan ko'nglingiz to'ldimi?

- "Mashal" jamoasiga yaratib berilgan sharoit uchun minnatdorchilik bildiraman. Transportdan tortib to maydongacha juda yaxshi tashkil qilib berishdi. Hammasi alo darajada bo'ldi.


- Zabihillo O'rinboev yaxshi o'ynab turgandi, uni nega o'zgartirdingiz?

- O'rinboev charchab qolgandek ko'rindi, shu sabab uni almashtirdik. Hujum chizig'ini kuchaytirish asosiy maqsadimiz edi. SHuning uchun maydonga yangi kuchlarni tashladik. Xavfli vpziyatlarimiz ko'p bo'ldi, lekin yuzaga kelgan vaziyatlardan biz foydalana olmadik.

- “Navbahor” bugun ochko oldimi yoki yo'qotdimi?

- Takror aytaman, durang adolatli natija. Har ikki jamoa ham g'alabaga munosib emas edi.


- O'z vaqtida “Mashal”da ishlagansiz. O'sha paytdagi jamoa bilan hozirgisining o'rtasida qanday farq bor?

- O'tgan davrdagi "Mashal" tarkibi ancha kuchliroq edi. CHunki tarkibda tajribali o'yinchilar jam bo'lgandi. Masalan Mirjalol Qosimov, SHuhrat Mirxoldirshoev, Dilaver Vaniev singari futbolchilar tarkibda bor edi. Hozirgi tarkib ham yomon emas, lekin o'sha davrdagi tarkib juda yuqori saviyada o'yin namoyish etgandi.