Vadim Abramov: "Bizning faqatgina hakamlar orqali yutayotganimizni aytishganidan keyin mana nimalar bo'ldi"

- Nima ham derdim. O'yinni birinchi bo'limdayoq tugatib qo'yishimiz mumkin edi. Afsuski, raqiblarning unchalik xavfli bo'lmagan birinchi hujumi gol bo'ldi. Aslida bunday holatlarda to'p darvozaga kirmasligi kerak edi. Standartdan keyin ikkinchi golni o'tkazib yubordik va barchasi tugadi. SHundan keyin maydonda futbol emas, futbolga o'xshash sport turi o'ynalishi boshlandi. Ikkinchi golni urganimizdan keyin bizga vaqt etishmadi. Bunday o'yinlarda g'alaba qozonish qiyin bo'ladi. Maydonda nimalar bo'lganini barcha ko'rdi. Bizning faqatgina hakamlar orqali yutayotganimizni aytishganidan keyin mana nimalar bo'ldi. Hakamlikni nazorat qiladiganlar bu holatlarni o'rganib chiqishar. 

- Hakamlarning bunday qarorlari futbolchilarning ruxiy holatiga tasir o'tkazadimi?

- Albatta. Bunday holat bilan birinchi marta to'qnash kelyapman. SHunchaki hakamlar bizga futbol o'ynashimizga yo'l qo'yishmadi. 

- Grigalashvili va Boydullaevning maydonga tushmagani tasirini o'tkazdimi?

- Yo'q. Reja qilgan ishlarimizni maydonda ko'rsatishga harakat qildik. Balki barchasi ham o'xshamagandir. SHunchaki holat shunday ko'rinish oldi.

- "G'ijduvon" jamoasi Sizni hayron qoldira oldimi?

- Ha, albatta. Juda ko'p hayron qoldirdi. Maydonda ko'p futbolchilari jarohat oldi. Ikkinchi bo'limda futbol o'ynaganimiz yo'q. Menimcha shunday. Ajoyib, ularni tabriklayman.