Ularning jasoratlari unutilmaydi

Bu azal-azaldan davom etib kelayotgan milliy qadriyat, urf-odatlarimiz sirasiga kiradi.

“GM Uzbekistan” akciyadorlik jamiyati Xorazm filiali tomonidan 9 may – Xotira va qadrlash kuni munosabati bilan mini futbol bo'yicha uyushtirilgan turnir yurtimiz tinchligi, elimiz osoyishtaligi yo'lida mardlik va jasorat ko'rsatib o'z jonini fido qilgan O'zbekiston Respublikasi Davlat xavfsizlik xizmati marhum xodimlari Sergey Davidov, Erik Gayazov va Sergey Nechipurenkoning porloq xotirasiga bag'ishlandi.

Filialning Pitnak shahridagi futbol maydonida uyushtirilgan mazkur musobaqada 10 ta jamoa qatnashdi. Mubolag'a emas, har bir uchrashuv qiziqarli va bayramona kayfiyatda o'tdi. Turnir g'olibligiga “Harbiy qism” jamoasi sazovor bo'ldi. Ikkinchi o'rin O'zbekiston yoshlar ittifoqi Hazorasp tumani kengashi futbolchilariga nasib etdi. Faxrli uchinchi o'rinni “GM O’zbekiston” AJ Xorazm viloyati filialining “Khorezm Auto” jamoasi qo'lga kiritdi.

- Ilk bor uyushtirilgan turnirimiz barchada qiziqish uyg'otdi, - deydi musobaqa bosh hakami Otabek Artikov. – Unda ko'plab jamoalar qatnashish istagini bildirishdi. Turnirning ochilish va yopilish marosimlari yuksak saviyada tashkil etildi. Kelgusida, musobaqani ananaga aylantirish niyatimiz bor. Zero, “Ajdodlarni xotirlash-muqaddas qadriyat”dir. Aminmizki, bunday musobaqalar yosh avlodni vatanimizga sadoqatli, xalqimizga mehr-muhabbatli va vatanparvarlik ruhida tarbiyalashga, buning barobarida, hamyurtlarimizni tinchlik va osoyishtalikning qadriga etishida xizmat qiladi.

Musobaqaning yopilish marosimida g'olib va sovrindor jamoalar tashkilotchilar tomonidan diplom va qimmatbaho sovg'alar bilan taqdirlanishdi.


Ikrom XUDOYBERGANOV.