Tohir Kapadze: “Qo'qon-1912” oldiga oliy ligaga chiqish vazifasi kelasi yil qo'yiladi”

-   Tohir aka, avvalo o'yin haqida nima deya olasiz?
-   Bugungi bahs o'ziga yarasha qiziqarli ruhda kechdi. Menga maydonning holati juda yoqdi. Bunday maydonlarda maza qilib futbol o'ynasa bo'ladi. Bizda ikkita golga tortadigan vaziyat bo'ldi, “Mashal”da esa yo'q deganda 5-6ta imkoniyat yuzaga keldi va ular javobsiz uchta to'p kiritishning uddasidan chiqishdi. O'yin yakkakurashlarga boy tarzda kechdi. Biz yaxshiroq o'ynashimiz mumkin edi. Menimcha, bunga futbolchilarimizda charchoq alomatlari borligi xalaqit berdi. O'ylaymanki, Qo'qonda kechadigan javob bellashuvida “Mashal”ga jiddiy qarshilik ko'rsatamiz.
 
-   Jamoangiz o'tgan turda “Spartak” ustidan g'alaba qozonganida ko'pchilik “Mashal”ga ham qiyin bo'ladi deb kutgandi.
-   Avvalo “Mashal” bilan “Spartak”ni solishtirish kerak emas. Qolaversa, muborakliklar oliy ligaga chiqish uchun harakat qilishmoqda. Tan olish kerak, birinchi ligada “Mashal” va “Andijon” boshqalardan kuchli.
 
-   3:0 hisobi o'yinga mos bo'ldi deb o'ylaysizmi?
-   Endi birinchi gol penaltidan kiritildi. Taym oxirlarida gol o'tkazib yuborish har qanday jamoaning kayfiyatiga tasir qiladi. 3:0 salgina ko'payib ketdi. 3:1 bo'lsa yaxshi bo'lardi.
 
-   “Qo'qon-1912” oldiga oliy ligaga chiqish vazifasi qo'yilgan deb eshitdik.
-   Bunday vazifani keyingi yil qo'ymoqchimiz. CHunki bu yil tashkiliy masalalar bilan bog'liq qiladigan ishlarimiz ko'p. Bir yil ichida vazifa qo'yib birdaniga oliy ligaga chiqib bo'lmaydi.


Xayrulla Xoliqov suhbatlashdi.