Suhrob Izzatov: “Bugun omad bizga kulib boqdi”

- Bugun qiziqarli o'yin bo'ldi. “Turon” gol urish uchun ko'proq imkoniyatlarga ega bo'ldi. Lekin omad ko'proq bizga kulib boqdi va muhim bo'lgan gollar evaziga g'alaba qozondik. Raqibimizga g'alaba zarurligi uchun ham bugun hujumkor futbolni tanladi va bizga qarshilik ko'rsatdi. Biz ham o'z maydonimizda g'alaba qozonmasak bo'lmasdi. Qisqasi, oson bo'lmagan g'alabani qo'lga kiritdik. 

Maydonda bir kishi kam bo'lib qolganimizdan keyin bizda tushkunlik holati kuzatilmadi. Lekin hisob tenglashganidan so'ng qolgan vaqt davomida bizga oson bo'lmasligini tushunib turgandik. Ehtiyotkorlik bilan harakat qilmasak, bu bizga qimmatga tushishidan xavfsirab turgandik.  Keyinchalik maydondagi futbolchilar soni teng holatga kelganidan so'ng, bizda g'alaba qozonish uchun ishtiyoq oshdi va muhim gollarni urib oldik. 

Sovrinli o'rinlar uchun imkoniyatlarimizga kelsak, taqvimiz biroz qiyinroq.  Lekin biz  oxirigacha xalqaro maydonga yo'llanma beradigan yo'llanmalar uchun kurashamiz. Oldinda turgan o'yinlarimizda ijobiy natija qayd etishga intilamiz. Bundan tashqari, O'zbekiston kubogida g'oliblikni qo'lga kiritgan holda, xalqaro maydonda to'p tepish imkoniyatimiz bor. SHundan ham foydalanib ko'rmoqchimiz”, - deya so'zini yakunladi Izzatov.