“Spartak” - ochiq birinchilik g'olibi

O'zbekiston Respublikasi Prezidentining “Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida”gi farmoni bu borada dasturilamal vazifasini o'tayotir.
O'zbekiston “Mahalla” xayriya jamoat fondi Xorazm viloyat bo'limi boshqaruvi hamda Sport o'yinlari va engil atletikaga ixtisoslashtirilgan bolalar-o'smirlar sport maktabi hamkorligida futbol bo'yicha o'tkazilgan ochiq birinchilik ham ana shu ezgu ishlar samarasidir.

Binobarin, 2021 yil – “Yoshlarni qo'llab-quvvatlash va aholi salomatligini mustahkamlash yili”ga bag'ishlab Urganch shahridagi “Yoshlik” sport majmuasi va 1-son futbol mahorati maktabi stadionida uyushtirilgan mazkur musobaqada Xorazm va Buxoro viloyatlarining 2007 - 2008 yillarda tug'ilgan yosh “charm to'p” o'yini ustalaridan tashkil topgan 14 ta jamoa bahs yuritdi.

Uchinchi o'rin uchun bo'lib o'tgan o'yinda Urganch shahrining “Dinamo” va Gurlan tumanining “Gurlan-24” jamoalari o'zaro kuch sinashdi. Bu uchrashuvda viloyat markazining yosh futbolchilari 2:1 hisobida g'alaba qozonishdi.
Final bellashuvida “Gurlan” (Gurlan tumani) va Sport o'yinlari va engil atletikaga ixtisoslashtirilgan bolalar-o'smirlar sport maktabining “Spartak” jamoalari maydonga tushishdi. Qiziqarli lahzalarga boy kechgan ushbu o'yinda sport maktabi tarbiyalanuvchilari 4:2 hisobida zafar quchib, ochiq birinchilik g'olibiga aylanishdi.

Musobaqaning yopilish marosimida g'olib va sovrindor jamoalarning futbolchilari, shuningdek, eng yaxshi o'yinchilar tashkilotchilar tomonidan munosib taqdirlandilar. 

Ikrom XUDOYBERGANOV, Urganch shahridan.