"SHo'rtan": Tatil tugadi, navbat tayyorgarlikka

Mana endi 13 iyuldan etiboran ikkinchi davra bahslariga tayyorgarlik bosqichi boshlanadi. Jamoa vakillari dastlab, G'uzordagi qarorgohda mashg'ulotlarga kirishishadi. Bu erdagi tayyorgarlik ishlari 19 iyulga qadar olib boriladi. Aynan o'sha kuni viloyatda faoliyat ko'rsatayotgan Oliy yoki birinchi liga jamoalaridan biri bilan o'rtoqlik sinov-nazorat uchrashuvi o'tkazilishi rejalashtirilgan. SHundan keyin barchaga bir kunlik dam beriladi va “SHo'rtan” azolari poytaxtda jam bo'lishadi. Toshkentdagi mashg'ulotlar 28 iyulgacha davom ettiriladi. Bu vaqt oralig'ida Muxtor Qurbonov boshchiligidagi jamoa 23 va 26 iyul kunlari Oliy liganing ikki  vakili bilan o'zaro kuch sinashib ko'radi. Poytaxt yig'inining so'nggi kunida murabbiylar va futbolchilar O'FF qoshida faoliyat ko'rsatayotgan “Futbol-Med” tibbiy muassasasida o'z sog'liklarini ko'rikdan o'tkazishadi. SHundan so'ng, “SHo'rtan” jamoasi G'uzorga qaytadi va ikkinchi davraning “Neftchi” (Farg'ona) bilan bo'ladigan dastlabki uchrashuviga o'z qarorgohida tayyorgarlik ishlarini olib boradi.

Tarkibdagi o'zgarishlarga kelsak, bu borada bir qator yangiliklar yuz berishi kutilmoqda. Birinchi davrada klub rahbariyati va murabbiylar guruhi ishonchini oqlay olmagan bazi bir futbolchilarga javob berilishi mumkin. O'z-o'zidan esa ketganlar o'rnini yangi futbolchilar hisobiga to'ldirish rejasi ham ishlab chiqilgan.

Aynan ushbu holatga 13 iyuldan boshlanadigan yig'in davomida oydinlik kiritiladi.