SHohruh Gadoev Janubiy Koreya chempionatida paydo bo'lishi mumkin

Kuni kecha "Nasaf" lagerini tark etgan SHohruh Gadoev faoliyatini qaysi chempionatda davom ettirishi jumboqligicha qolmoqda.

Malumot o'rnida shuni qayd etish joizki, SHohruh Gadoev "Nasaf" bosh murabbiyi Ro'ziqul Berdiev bilan o'rtadagi munosabatlari yomonlashgani bois, jamoadan ketish haqida o'ylab yurgandi. Gadoevga Bahrayn klubi va Toshkentning ikki jamoasi "Bunyodkor" hamda "Lokomotiv"dan jiddiy qiziqish bo'layotgandi. SHohruh Gadoev ushbu variantlar ichidan birini tanlashga qiynalayotgan edi. Olingan so'nggi malumotlarga ko'ra, iqtidorli vinger SHohruh Gadoevga Janubiy Koreya chempionati vakilidan ham taklif tushgan.

Eslatib o'tamiz, o'tgan mavsum starti oldidan "Bunyodkor" klubi "Nasaf"ga SHohruh Gadoev borasida rasmiy taklif bilan chiqishgandi. Biroq "ajdarlar" o'shanda "qaldirg'ochlar"ning taklifiga rad javobini berishgandi. O'tgan yilgi "Nasaf" - "Paxtakor" (0:1) o'yinidan so'ng "ajdarlar" ustozi Ro'ziqul Berdiev SHohruh Gadoevni keskin tanqid qilib, jamoadan ketishiga qarshi emasligini bildirgandi va shogirdini o'yinini umuman talabga javob bermasligini aytgandi.

Ayni paytda futbolchi qaerga yo'l olgani ochiqligicha qolmoqda. Katta ehtimol bilan SHohruh Gadoev xorijga ketgani taxmin qilinmoqda.

Futbolchini oldida xorijdan yana bir qator takliflar mavjud. SHohruh Gadoev Bahrayn yoki Janubiy Koreya klublaridan birini taklifini qabul qilgan bo'lishi mumkin.