Ravshan Haydarov: Dinamoda yoshlardan iborat poydevor borligi xursand qiladi

- Muxlislariga nihoyat kutilgan g'alabani taqdim etdik, deya olaman. SHogirdlarimning bugungi harakatlaridan ko'nglim to'ldi. “Navbahor” ancha shakillangan jamoalardan biridir. Ularga qarshi o'ynash bizga doim qiyinchilik tug'dirgan. SHogirdlarim o'yin mobaynida to'pni nazorat qilib turishdi. Issiq havoda futbol o'ynashni o'zi bo'lmaydi. Bolalar bugungi o'yinda yutishlari kerakligini his etgan holda bor kuchlarini berib o'ynashdi. Natijada biz o'z hisobimizga uch ochkoni qo'shib qo'ydik.

- O'zbekiston yoshlar terma jamoasiga murabbiy etib tayinlandingiz, aytingchi, “Dinamo” vakillarini ham biz ushbu terma tarkibida ko'rishimiz mumkinmi?

- Bir-ikki futbolchilarni ko'z ostimga olib qo'yganman, nasib bo'lsa, ularni yig'inlarga chaqirib boraman.

- Dinamoning birinchi davradagi o'yinlaridan ko'nglingiz to'ldimi?

- To'g'risini aytadigan bo'lsam, ko'nglim to'lmadi. Turnir jadvalidagi o'rnimiz ham buni ko'rsatib turibdi. Biz birin-ketin kuchli to'rtlikdagi klublar bilan o'yinlar o'tkazdik, o'rtamiyona klublar uchun bu ancha qiyin. Bir qator futbolchilarimizning kutilmaganda jarohatlar olishlari ham natijalarga katta tasir o'tkazmay qolmadi. “Qizilqum” va “Mashal”ga qarshi o'yinlarda imkoniyatni boy berib qo'ydik. Davra boshi va oxirida yaxshi o'yin ko'rsatdik, o'rtada esa ayniqsa Paxtakorga qarshi o'yindan keyin ruhiy pasayish sezildi jamoada. Bu esa natijamizga tasir etdi. Eng asosiysi esa, Dinamoda yoshlardan iborat poydevor borligi meni xursand qiladi.

- Samarqanddagi faoliyatingiz o'z yakuniga etdimi? O'zbekiston yoshlar terma jamoasi bilan bir vaqtda “Dinamo”da ishlamoqchimisiz?

- Hali bu borada na rahbariyat, na O'FF bilan gaplashganim yo'q. SHu sababli bu savolingizga javob bera olmayman. CHunki, rasmiy ishlar hal bo'lganidan keyin barchasi haqida bemalol gapirish mumkin.