Quttiboev ikkinchi bosqichda ham yoshlarga ishonch bildiradi

Birinch bosqichda “G'arb” mintaqasida ishtirok etgan Nukusning “Orol” jamoasi ikkinchi bosqichda ham ishtirok etish huquqini qo'lga kiritgandi. SHu bois ayni damda jamoa o'z qarorgohida tayyorgarlikni boshlab yuborgan. Ushbu jamoaga Qoraqalpoq futbolining yorqin namoyondalaridan biri Nematullo Quttiboev ustozliq qilib kelmoqda. Kuni-kecha ushbu yosh murabbiy bilan suhbatlashganimizda, quyidagilarni bildirib o'tdi.

"Jamoamizda moliyaviy muammolar yuzaga kelganligi sababli futbolchilarga berilgan tatil biroz cho'zilib ketdi", – deya gap boshladi Quttiboev. "Yaqinda hammasi ijobiy hal etildi va yig'inni boshlab yubordik. Bilasiz, hozir ko'plab klublarda moddiy qiyinchilik bor. SHu bilan birga “Orol”da ham. Lekin boya aytganimdek, futbolchilarni o'z qarorgohimizda yig'ishga erishdik va mashg'ulotlarni o'tkazyapmiz. Ikkinchi bosqich o'yinlari boshlanishiga ham oz fursat qolmoqda. Tarkibimizda aytarli jiddiy o'zgarishlar qilinmadi. To'g'ri, hozir ko'rikdan o'tish uchun bir nechta futbolchiloar kelgan. Ular asosan ikkinchi ligada o'ynagan mahalliy futbolchilardir. Safimizni birgina Temur Turdiev tark etdi. Menga malum bo'lishicha, himoyachi oliy liga vakili “Qizilqum” tarkibiga borib qo'shilgan. Ayrim chiziqlarni kuchaytirishni rejalashtirganmiz. Xususan bitta munosib darvozabon kerak. Xolbuki, imkoni bo'lganida har bir poziciyaga o'yinchi olgan bo'lardik. Lekin shunisi aniqki, ikkinchi bosqichda ham asosan o'zimizning mahalliy yosh futbolchilarga imkoniyat beramiz".