“Qizilqum” - “So'g'diyona”: Mezbonlarning mag'lubiyatsiz yurishi beshtaga etadimi?

Turnir jadvalining quyi o'rinlarida borayotgan “So'g'diyona” Navoiyda “Qizilqum” mehmoni bo'ladi.

Ayni paytda “Qizilqum” 14 ochko to'plagan holda 9-o'rinda boryapti. “So'g'diyona” hisobida esa 7 ochko mavjud va bu jamoa 13-o'rinni egallab turibdi. Qizig'i shundaki, “So'g'diyona” pastki o'rinlarda yurgan bo'lsa-da, 14ta gol urishning uddasidan chiqqan. “Qizilqum” esa hozircha 11ta to'p kiritishga muvaffaq bo'ldi.  

Jizzaxliklar oxirgi to'rt uchrashuvning ikkitasida g'alaba qozonib, ikkitasida mag'lub bo'lishdi. Jamoa mana shu to'rt o'yindan uchtasini o'z maydonida o'tkazib, “Neftchi”ni mag'lub etgan bo'lsa, “Bunyodkor” va “Paxtakor”ga imkoniyatni boy berdi. Safarda esa “Andijon”ni yutib qaytdi. Mana endi Davron Fayziev shogirdlari bugun ham safarda to'p tepishadi, ammo raqib “Andijon”ga qaraganda ancha kuchli klub. SHunday ekan, “Qizilqum” maydonidan ochko bilan qaytish oson bo'lmaydi.

Agar “Qizilqum” bugungi uchrashuvda g'alaba qozonsa yoki durang qayd etsa, ularning ketma-ket mag'lubiyatsiz seriyasi beshtaga etadi. “Qizilqum” oxirgi marta 8-turda “Lokomotiv”ga imkoniyatni boy bergandi. SHundan beri to'rt uchrashuv o'tkazgan Yuriy Lukin shogirdlari hali mag'lub bo'lishmadi: uchta durang va bitta g'alaba. Birinchi davraning oxirida “Qizilqum” mag'lubiyatsiz seriyasini beshta qilib qo'ya oladimi? Buni bugungi o'yin yakuniga etgach bilib olamiz.

X.Xoliqov.