Piter Xyuistra: "Mavsumdagi eng yaxshi o'yinlarimizdan birini o'tkazdik"

"Havo harorati pastlagani sababli har ikki jamoa futbolchilari harakatida tezkorlik ko'zga tashlandi. Jamoam bugun yaxshi o'yin ko'rsatdi, hujumda ko'plab imkoniyatlarga ega bo'ldik. Bir necha vaziyatlar yaratdik va yirik g'alabaga erishdik. Futbolchilarimdan har tomonlama qoniqish hosil qildim. Mavsumdagi eng yaxshi o'yinlarimizdan biri bo'ldi, deya olaman", – deydi Piter Xyuistra. 

- "Paxtakor" bugungi kunda raqobatchilaridan ancha o'zib ketgan. SHu bois maydonga yanada ko'proq yoshlarni tushirishni imkoni bormi?

- SHundoq ham mavsum davomida yoshlarga imkoniyat berib kelyapmiz. "Paxtakor" yosh va tajribali futbolchilarning uyg'unlashuvidan tashkil topgan jamoa hisoblanadi. Kim o'zini ko'rsatsa, asosiy tarkibga loyiq ekanligini isbotlasa, tushiramiz. 

- Bir necha kun oldin SHveciya bilan o'yinda maydonga tushgan futbolchilar bugun ham asosiy tarkibda harakat qildi. Ularda charchoq alomatlari yo'qmidi?

- Terma jamoa safidan qaytgan o'yinchilar tez tiklanishdi. SHuning uchun asosiy tarkibda maydonga tushishdi. Biz doim futbolchilarning yaxshiroq holatda bo'lishiga intilamiz. Mashg'ulot va o'yinlarda o'sib, har bahsda yaxshiroq ko'rinishga urinamiz. Hali eng yaxshi darajaga chiqib ulgurmadik. SHu yo'l sari harakat qilyapmiz.

- Besh kundan so'ng Toshkentda "Navbahor" bilan o'ynaysizlar. Mazkur uchrashuv haqida fikringizni bildirsangiz...

- Ushbu bahsga qadar besh kun vaqtimiz bor. Yanada yaxshiroq o'ynash uchun harakat qilamiz. Ko'rsatayotgan o'yinimiz har doim yaxshi bo'lishi kerak. Raqib jamoa haqida biror narsa deya olmayman. Hali ularni o'rganmadik.