O'zbekiston U-22 terma jamoasi o'rtoqlik o'yinida Xitoy U-22 yoshlarini mag'lub etdi

Xitoyning SHanxay shahrida navbatdagi yig'inini o'tkazayotgan O'zbekiston U-22 yoshlar terma jamoasi bugun rejaga muvofiq Xitoy U-22 yoshlar terma jamoasiga qarshi o'rtoqlik uchrashuvini o'tkazdi. O'yinning ikkinchi bo'limi 68-daqiqasida Igor Sergeev boshi bilan bergan zarbadan so'ng o'yinda hisob ochildi. Qolgan daqiqalarda hisob o'zgarmadi va Sergeevning yagona goli O'zbekiston U-22 terma jamoasiga g'alaba keltirdi.

O'zbekiston va Xitoy yoshlar terma jamoalari avvaldan rejalashtirilganidek 24 iyun kuni o'zaro ikkinchi o'rtoqlik o'yinida maydonga tushadilar. Ikkinchi uchrashuv SHanxay yaqinidagi Vusi shahrida bo'lib o'tadi. 22 iyun kuni Maqsudov shogirdlari SHanxaydan Vusi shahriga yo'l oladilar va mashg'ulotlarni o'sha erda davom ettiradilar.

Eslatib o'tamiz, SHuhrat Maqsudov bosh murabbiyligidagi O'zbekiston U-22 terma jamoasi 18 iyun kuni o'zining navbatdagi o'quv-mashg'ulot yig'inini o'tkazish uchun Xitoyning SHanxay shahriga uchib ketgan edi. Terma jamoa bosh murabbiyi mazkur yig'inga jami 23 nafar futbolchini jalb etgan.

O'rtoqlik uchrashuvi. 21 iyun. SHanxay (Xitoy).
XITOY (U-22) – O'ZBEKISTON (U-22) – 0:1
Gol: Igor Sergeev (68).
O'zbekiston U-22: Akmal Tursunboev, Toxir SHamsiddinov (Maksimilan Fomin 83), Boburbek Yo'ldoshev (Muhsin Ubaydullaev 90+2), Sardor Rahmonov, Javlon Mirabdullaev, Sardor Sobirxo'jaev (Abdullox Olimov 65), Abbos Maxstaliev, Vladimir Kozak (S), Jamshid Iskanderov, Diyor Turopov (Temur Hakimov 46), Igor Sergeev (Jasurbek Hakimov).
CHetlatish: Sardor Rahmonov (41).