O'zbekiston o'smirlar terma jamoasi (U-16) Minsk shahrida o'tkaziladigan "Rivojlanish Kubogi-2022" turnirida ishtirok etadi

Server Jeparov qo'l ostidagi O'zbekiston o'smirlar terma jamoasi (U-16) futbolchilari 5-14 fevral kunlari Minsk shahrida o'tkaziladigan "Rivojlanish Kubogi" xalqaro musobaqasida ishtirok etishadi.

Turnir g'olibligi uchun o'nta terma jamoa kurash olib boradi. O'zbekiston o'smirlar terma jamoasi musobaqaning «B» guruhidan o'rin olgan bo'lib, Belarus (U-16), Moldova, Bahrayn va isroillik tengqurlari bilan kuch sinashishadi. 

Musobaqaning guruh bosqichidagi jamoalar o'zaro bir martadan o'yin o'tkazishadi. Guruh g'olibi final yo'llanmasiga ega bo'ladi. O'z guruhida ikkinchi o'rinni egallagan jamoalar esa o'zaro bronza medali uchun bahs olib borishadi. SHuningdek, 5-6, 7-8 va 9-10 o'rinlarni aniqlash uchun ham o'yinlar tashkil qilinadi.

"Rivojlanish Kubogi-2022"

«A» guruhi: Belarus (U-17), Qozog'iston, Ozarbayjon, Tojikiston, Eron.

«B» guruhi: Belarus (U-16), Moldova, Bahrayn, O'zbekiston, Isroil.