O'zbekiston MTJ Tailandga qarshi o'yin oldidan mashg'ulot o'tkazdi+Abdulla Abdullaevdan intervyu
13 iyu 2022 23:31
Yangiliklar

O'zbekiston MTJ Tailandga qarshi o'yin oldidan mashg'ulot o'tkazdi+Abdulla Abdullaevdan intervyu

Teglar : O'zbekiston terma jamoasi Osiyo Kubogi-2023 saralash bosqichi

Xabaringiz bor, Namanganda Osiyo Kubogi-2023 hal qiluvchi saralash bosqichi bo'lib o'tmoqda.

Ertaga "S" guruhining 3-turidan o'rin olgan O'zbekiston - Tailand uchrashuvi o'tkaziladi. Mazkur bahs oldidan terma jamoamiz navbatdagi mashg'ulotini o'tkazdi.

Bugungi mashg'ulotda Husniddin Aliqulov biroz betobligi sababli ishtirok etolmadi. Qolgan barcha futbolchilar tayyorgarlik jarayonida qatnashdi. Mashg'ulot ko'tarinki ruhda o'tkazildi. Jumladan, MTJ sardori Eldor SHomurodov fotosuratchilik mahoratini namoyish etdi.

SHuningdek, jamoa azosi Abdulla Abdullaev bo'lajak bahs haqidagi fikrlari bilan o'rtoqlashdi.

- Bo'lajak o'yin biz uchun muhim ahamiyatga ega, chunki mazkur bahsda g'alaba qozonishimiz shart. Muxlislar bizni qo'llab-quvvatlamoqda, ularga minnatdorchilik bildiramiz. Qo'limizdan kelgancha, chiroyli o'yin orqali g'alaba qozonib, saralashni yorug' yuz bilan yakunlaymiz degan umiddaman.
- Maldiv orollariga qarshi o'yinda raqib futbolchisi bilan to'qnashib ketdingiz va shifokorlardan yordam oldingiz. Hozirgi ahvolingiz qay darajada?
- Ha, biroz lat edim. Biroq murabbiy tarkibga kiritsa, maydonga tushishga tayyorman.
- AGMKda sizni tayanch yarim himoyasida ko'rardik. Terma jamoada esa markaziy himoya zonasida harakat qilyapsiz. Ushbu poziciyada o'zingizni qanday his qilyapsiz?
- Futbolchi barcha nuqtada mukammal bo'lishi kerak, murabbiy uni qaerga joylashtirsa, o'sha erda o'ynay bilishi lozim. Men ikkala poziciyada ham o'zimni yaxshi his qilaman, joy tanlaydigan odatim yo'q. Muhimi, jamoaga nafim tegsa bo'lgani.
- Katanec va Mirjalol Qosimovning o'xshash va farqli jihatlarini ayta olasizmi?
- Ularning o'ziga yarasha qattiqqo'lligi, futbolga bo'lgan qarashlari mavjud. Muhimi, ular o'yinga tayyor bo'lishni hamda natija keltira olishni xohlaydi.
- Muxlislarga tilaklaringiz...
- Muxlislarga bizni qo'llab-quvvatlashgani uchun yana bir bor minnatdorchilik bildiraman. Ularni faqatgina terma jamoa ishtirokidagi o'yinlargi emas, mamlakat chempionatidagi uchrashuvlarga ham taklif qilib qolardim. O'ylaymanki, chiroyli o'yin namoyish etish orqali ularni xursand qilishda davom etamiz.

Bugungi mashg'ulotga oid qiziqarli barcha suratlarni GALEREYA bo'limi orqali tomosha qilishingiz mumkin.