O'zbekcha transfer. "Bunyodkor" Aziz Haydarovning sotuvidan qancha daromad qilgan?

Bundan ruhlangan saytimiz ijodkorlari (aniqrog'i, 1 nafar ijodkori) yana bir ruknga start berishmoqda. Endi tarixda o'zbek klublari yoki futbolchilari ishtirokida tuzilgan transfer bitimlari to'g'risida ham muntazam ravishda malumot berib boramiz. Demak, 1-sonda "Bunyodkor" va "Al SHabab" jamoalari o'rtasida tuzilgan shartnoma haqida.

Xabaringiz bor, Qatar yashil maydonlarida o'tkazilgan 2011 yilgi Osiyo kubogi terma jamoamiz futbolchilari uchun o'ziga xos tramplin vazifasini bajarib bergan. O'sha musobaqadan keyin "Bunyodkor" yarim himoyachisi Azizbek Haydarovda RPL vakili "Rostov" tarkibiga borib qo'shilish imkoniyati paydo bo'lgan, ammo futbolchining o'zi BAA pro ligasini tanlagan. Ayni paytda O'FA terma jamoalar bo'limi boshlig'i vazifasida faoliyat yuritayotgan Haydarov o'sha damlarni shunday eslaydi:

"Men Osiyo Kubogi-2011dan so'ng "Bunyodkor"da yarim mavsum o'ynadim va "Al SHabab"ga yo'l oldim. Unga qadar mavsum oldidan Anzur Ismoilov Xitoyga ketgandi. Avstriyadagi yig'in paytida "Al SHabab"ga ketmoqchi bo'lib yurgan paytim Vadim Abramov menga "Rostov"ga o'tishim kerakligini aytdi. Mashg'ulot o'tkazayotgan paytim Karlenovich maydon markazidan darvoza to'sini yoki ustunini nishonga ola bilsam, "Al SHabab"ga yo'l olishimni, aks holda "Rostov"ga ketishim kerakligi borasida shart qo'ydi. Men tepgan to'p esa darvoza to'siniga tegdi va BAA jamoasiga yo'l oldim".

Aziz Haydarov 2011 yilning 1 avgust kuni "Al SHabab" futbolchisiga aylandi. "Transfermarkt" malumotiga ko'ra, o'shanda "qaldirg'ochlar" o'yinchining transferidan 350 ming ming evro ishlab olgan. Malumot uchun, bu paytda Haydarovning transfer qiymati portal tomonidan 400 ming evroga baholanayotgan edi.

Aziz Haydarov "Al SHabab" uchun 2017 yilning yoziga qadar o'ynadi. U bu muddat ichida 133 o'yinda maydonga tushib, 13 ta gol urdi va 10 bor jamoadoshlariga shunday imkoniyat yaratib berdi.