Oybek Qilichev: Yozda Malayziyaga qaytsam kerak

Ushbu g'alaba sherlarga pley-offga chiqish imkoniyatlarini qaytarib berdi. SHu kuni tajribali yarim himoyachi Oybek Qilichev ham jamoasi muvaffaqiyatiga o'zining munosib hissasini qo'shdi. Etiborga molik jihati shundaki, Oybek o'z vaqtida Eron chempionatida to'p surgandi. Yaqinda Qilichevdan intervyu olib, uning fikrlari bilan qiziqdik.

- Oybek, Paxtakor tarkibiga kech qo'shildingiz. Sizda mavsumni Malayziya chempionatida boshlash varianti ham bor edi. Nima sababdan bu o'tish amalga oshmay qoldi?

- Haqiqatan ham mavsumni Malayziyaning Perak klubida boshlashim kerak edi. Jamoa mashg'ulotlarida ishtirok etib, yaxshi taassurot qoldirganimdan so'ng menga ikki yillik shartnoma taklif qilishgandi. O'tgan yili Eron chempionatida o'ynadim. Paykon oliy divizionni tark etgach, 3ta uchrashuvda maydonga tushib, so'ngra shartnomani bekor qildim. Bu yil Malayziyada yangi qonun qabul qilinibdi, unga ko'ra, elita jamoalari 1-ligadan kelgan futbolchilarga shartnoma taklif qilolmas ekanlar. Buni Perak bilan bitim tuzib bo'lganimizdan so'ng bildik. Hatto, klub rahbariyatining ham yangilikdan xabari yo'q ekan. Paxtakorga kech kelib qo'shilganimning sababi ham shu.

- Demak, sizda Perak klubiga qaytish imkoniyati bor. Zero, ayni payt oliy ligada o'ynayapsiz...

- Albatta. Og'zaki kelishuvga ko'ra, Paxtakor sharafini birinchi davra yakuniga qadar himoya qilaman. Iyun oyida esa Perak safiga borib qo'shilaman.

- Erondan ketishingizga nima sabab bo'ldi?

- Ochig'i, Paykon jamoasi juda yaxshi shakllangandi. Eron termasiga nomzod darvozabonimiz bor edi. Bundan tashqari, klubimizda Angliya va Braziliyadan kelgan legionerlar o'ynashayotgandi. Oliy divizionda qolishimizga bitta g'alaba etishmadi. Agar uch ochko qo'lga kiritilganida, balki hozir siz bilan bu mavzuda suhbatlashmayotgan bo'larmidik. Ikkinchi davrada ettita durang qayd etdik. Jamoamiz omadsizlik tufayligina birinchi ligaga tushib ketdi. SHunga qaramay, klub prezidenti jamoada qolishimni istadi. Maoshim miqdori o'zgarmasligini kafolatlashdi. Mavsum startidagi uchta o'yinda to'p surdim. Jamoamiz bu bahslarning hammasida yirik hisobda g'alaba qozondi. Birinchi liga yakunlariga ko'ra, 3ta klub elitaga yo'llanma olar ekan. Bir yillik tanaffusdan so'ng bemalol oliy ligaga qaytar edik. Lekin bu borada boshqa takliflar bo'lgani uchun Paykonni tark etishimga to'g'ri keldi.

- Xorij klublaridan taklif tushsa, Paxtakor rahbariyati sizni qo'yib yuboradimi?

- Ha, shartnoma bandida shunday kelishuv bor. Qancha vaqt o'ynashimdan qatiy nazar, Paxtakorning g'alabalariga hissa qo'shishni istayman. SHu maqsadda jonajon klubimga qaytdim.

- Paxtakorda o'z poziciyangizda o'ynayapsizmi yoki boshqa chiziqlarda ham sinab ko'rishyaptimi?

- Avvallari markaziy yarim himoya chizig'ida to'p surardim. Vaziyatga qarab chap va o'ng qanotga o'tishim mumkin. Ochig'i, menga qaerda o'ynashning far-qi yo'q. Murabbiylar ishonch bildirib, maydonga tushirishsa bo'lgani.

- Eron chempionatiga qanday tarif berasiz?

- Maydonning har bir qarichida kurash so'nggi soniyalargacha davom etadi. Klublarida jismoniy tayyorgarlik muhim omil sanaladi. Hakamlar mayda qoidabuzarliklarga etibor qaratishmaydi, behuda hushtak chalaverishmaydi. O'zimda ham shunday holatlar bo'lgan. Bizning chempionatda qizil kartochka ko'rsatilishi mumkin bo'lgan vaziyatda menga hatto sariq kartochka ham berishmagandi. Bundan ajablanganman.

- Oybek, statistikaga etibor qaratsak, siz ko'p ogohlantirish olasiz. Tabiatan ham shunday qiziqqonmisiz?

- Menimcha, bu maydondagi holat bilan bog'liq bo'lsa kerak. O'zim istamagan holatda raqibga nisbatan qo'pollik ishlatib qo'yaman. Masalan, BAA chempionatida o'ynagan paytimda shu sariq kartochkalar sabab o'zim uchun juda muhim o'yinni o'tkazib yuborganman. Amirliklarda uchta ogohlantirish navbatdagi uchrashuvning o'tkazib yuborilishini anglatadi. Ikkita sarig'im borligini bila turib, Al-SHababga qarshi kechadigan o'yindan oldingi uchrashuvda yana ogohlantirish olganman. Vaholanki, bahs arafasida murabbiylar ehtiyotkorroq bo'lishim lozimligini uqtirishgandi. Maydondagi kurashda bu narsa esdan chiqib ketar ekan. Raqibga qo'pollik ishlatganimni sezmay qolganman.

- Malayziya chempionatida o'zbekistonlik futbolchilar soni ko'payib qoldi. Nima deb o'ylaysiz, vakillarimiz faqat moddiy manfaatni ustun qo'yishyaptimi yoki Malayziya chempionatidan nimanidir o'rganish mumkinmi?

- Moliyaviy tomondan yaxshi. Buni inkor etmaymiz. Lekin menimcha, futbolchilarimiz faqat pulni birinchi o'ringa qo'yishmayapti. Bu mamlakatda millionlar o'yinini juda yaxshi ko'rishadi. Hatto, o'rtoqlik o'yinlariga ham minglab tomoshabinlar tashrif buyurishadi. Bizda rasmiy uchrashuvlarga ham shuncha muxlis kelmaydi. Malayziya chempionatida o'sish katta. Klublarida Braziliya va boshqa davlatlar vakillari to'p surishyapti.

Kamoliddin ALIMOV suhbatlashdi